தெருப்பாடகன்!

வெட்கத்துண்டை வீசியவள்!

2012-02-11T15:36:00.000+05:30

எப்போது பார்த்தாலும்,
படித்தாலும்
மனசை கொள்ளை கொள்ளும்
தபூ சங்கரின்
காதல் கவிதைகள் நீ!

வெனிஸ்வேலா நாட்டுக்காரியை
உலக அழகியாகத் தெரிந்தார்கள் -
உன்னைப் பார்க்காத
முட்டாள்கள்!

உன் விரலைப் பிரிந்த
நகத்துண்டு,
உன்னை விட்டு உதிர்ந்த
தலை முடி,
உன்னை விட்டுத் தவறிய
கைக்குட்டை என
எதுவுமே என்னிடம் இல்லை!
உன்னை
வேண்டாமென்று வெறுத்தவை
எனக்கெதற்கு?

உனக்கான முக்கியத்துவத்தை
குறைத்து விடுவேனோ என்ற பயத்தில்,
நான் ஆசையாக எழுதிக்காட்டும்
கவிதைகளில் - நீ
ஆர்வம் காட்டாத போதெல்லாம்
உடனே எனக்குள் நினைத்துக் கொள்வேன் -
கவிதை மீது ஹைக்கூ ஒன்று
பொறாமைப் படுகிறதே என்று!

கூடுவிட்டுக் கூடுபாயும்
வித்தைக்காரன் நான்.
சமயங்களில் மாறிவிடுகிறேன்...
வர்ணக்குடுவை சுமந்துசெல்லும்
வண்ணத்துப்பூச்சியாய்,
உன் உதட்டுச் செம்பில்
நிறைந்து வழியும் புன்னகைப் பாலாய்,
உன் கண்களின் படபடப்புக்குள்
சிக்கிக் கொண்ட வெட்கத் துண்டாய்,
மஞ்சள் பூக்களாய்,
மலை நாட்டுச் சுடாத வெய்யிலாய்,
நதிகளை நனைக்கும்
சில்லென்ற மழையாய்
சமயங்களில் மாறித்தான் விடுகிறேன்...
ஏனென்றால்,
இவற்றுக்கு மட்டும்தான்
உன் அனுமதியின்றி
எப்போது வேண்டுமானாலும்
உன்னை ஸ்பரிசித்துப் பார்க்கும்
சலுகையும் உள்ளது!

நீ வெள்ளைச் சுடிதாரில்
வரும்போதெல்லாம் குழம்பிவிடுகிறேன்.....
உனக்கும் நிலவுக்கும் இடையில்
6 ஒற்றுமைகளை காண்பதில் உள்ள
இலகுத் தன்மையாலும்,
5 வேறுபாடுகளை காண்பதில் உள்ள
கடினத் தன்மையாலும்!

எனக்குப் பிடித்த பாடலை
மௌனமாக ரசிப்பேன்.
உனக்குப் பிடித்த பாடலின் வரிகளை
கவனமாக வாசிப்பேன்....
அதில் எங்கேனும்
என் பெயர் வருகிறதா என்று பார்க்க.

நல்ல நாள் பார்த்தே
உன் அப்பாவை சந்திக்கப் போகிறேன்.
உன்னைப் பெண் கேட்பதற்காக அல்ல.
என்னை உன்னிடம் எழுதித் தருவதற்காக!

.
.

வெட்கக்கேடு!

2012-02-09T22:36:00.000+05:30

*
**
***
**
*

கால்கள் செயலற்றுப்போன
இளைஞன் ஒருவன்
தன்நம்பிக்கையுடன்,
சாலையில்
பழங்கள்
விற்றுக்கொண்டிருப்பதைப் பார்த்தேன்...
தகுந்த வேலைக்காக
தலைக்கனத்துடன் காத்திருக்கும்
வேலையற்ற பட்டதாரிகள் சார்பாக
வெட்கித்தலை குனிந்தேன்!
.
.
.

தாழ்வு மனப்பாண்மை!

2012-02-01T20:20:00.002+05:30

>
உளவியல் கணிப்புப்படி

தாழ்வு மனப்பாண்மையின்

தாய் - உடலமைப்பு!

தந்தையோ - நிறக்குறைவு!

தாழ்வு மனப்பாண்மையை

விட்டொழி,

வெற்றி பெறுவாய் என்று போதிப்பது

சுய முன்னேற்றப் புத்தகங்களின்

விற்பனைத் தந்திரம்!

கல்லா கட்டியதும் தங்கள்

கடையை மூடி விடுவார்கள்!

பாதிக்கப்பட்டவனோ

பாதியிலே விடப்படுவான்!

உண்மையில்

உடல் அமைப்பும்

நிறக் குறைவும்

ஒருபோதும் நோயாகாது!

தோற்றத்தைப் பார்த்து

எடைபோடுபவர்களை

வேண்டுமானால்

மன நோயாளிகளாக

வைத்துக் கொள்ளலாம்.

அவர்கள் தொடர்புகளையும்

துண்டித்துக் கொள்லலாம்.

என்னைப் பொறுத்தவரை,

தாழ்வு மனப்பாண்மை என்பது

கேடயம்!

பந்தாக் காரர்களும், பணக்காரர்களும்

பவிசுக் காரர்களும், பதவிக்காரர்களும்

குணமற்றவர்களும், நல்ல மனமற்றவர்களும்

வடிகட்டப்பட்டு,

நல்லவர்கள் மட்டுமே

நட்பாய் கிடைக்கும்!

நல்ல நட்பு என்பது

மிகப் பெரும் வரம்!

தலைக்கனத்தோடு இருப்பதைவிட,

தாழ்வுமனப் பாண்மையுடன்

இருப்பதொன்றும் குற்றமெல்ல!

காரணம் -

முன்னையது எதையும் கற்றுத்தராமல்,

எப்போது வேண்டுமென்றாலும்

கீழே தள்ளிவிடக் காத்திருக்கும்.

பின்னையது

பணிவையும், சகிப்புத் தன்மையையும்

கற்றுத்தந்து

காலங்கள் கழித்தாவது

வாழ்வில் உயர்த்தும்!

தாழ்வுமனப் பாண்மை என்பது

தடைகளின் உச்சமல்ல.

அதை ஏற்றுக்கொண்டு

சாதித்தவர்களுக்கு

வரலாற்றில் பஞ்சமுமில்லை!

தாழ்வு மனப்பாண்மையை

விடச்சொல்லி ஒருபோதும்

சொல்லமாட்டேன்.....

அது தற்கொலைக்குத் தூண்டாதவாறு

பார்த்துக்கொள்ளவே சொல்வேன்!

உளவியல் உண்மை

2012-01-09T21:07:00.000+05:30

அப்பா இன்றி வளர்பவர்கள்
சமூகத்தில்
தன்நம்பிக்கை இன்றி
வளர்கிறார்கள்...
அம்மா இன்றி வளர்பவர்கள்
சமூகத்தில்
நல்ல பெண்களை
சட்டெனக் காதலிக்கிறார்கள்...
அப்பாவும், அம்மாவும்
இன்றி வளர்ந்தவர்கள்
சமூகமே வேண்டாமென்று
தனிமையுடன்
ஒதுங்கியே வாழ்கிறார்கள்!
.
.

அதன் பெயர் இருட்டு!

2012-01-08T07:19:00.001+05:30

அது ஒரு கனத்த பறவை.
அலகுகள் நீண்ட,
இறக்கைகள்பெருத்த
தந்திரப் பறவை.
அழகான எதுவுமற்ற,
பாடவும் தெரியாத
குரூரமாகக் கொலைசெய்யும்
கொடிய பறவை.

கடும் பசியுடன்
வெகு நேரம் காத்திருந்து,
இயற்கை ஆடைமாற்றச் சென்ற
ஒரு ஆரவாரமற்ற கணத்தில்,
சூரியனை
கூரான அலகால் கொத்திச் சென்று
உயரமான மரத்தின் மேலிருந்த
தன் கூட்டுக்குள் ஒளித்துக்கொண்டது.....
எப்போதோ கொத்தித் தின்ற
சுவையற்ற நிலவின் மிச்சத்தை
வானம் நோக்கித் துப்பியது!

அநேகமாக,
வேறொரு கூட்டிலிருந்து
பதப்படுத்தி வைக்கப்பட்ட
இன்னுமொரு சூரியன்
நாளை காலை
நன்றாக விடிவதற்குள்
நழுவி விழக்கூடும்!
விழாவிட்டால்,
எப்போதோ களவாடிவைத்த
மற்றுமொரு சூரியனை
அமெரிக்கா மீண்டும்
வானுக்கே அனுப்பும் அல்லது
வியாழனை அணுகுண்டால் எரிக்கும்.
எனவே கவலையில்லை!
.
.

மைக்ரோ கவிதைகள்

2012-01-02T21:21:00.001+05:30

கவிதை - 01 :
கடற்கரை விளிம்புகளில்
அணைத்துக் கொள்ளும்
குடை நிழல்களிலும்,
பூங்காவில்
வண்ணத்திப் பூச்சிகளால்
பரிமாறப்படும் முத்தங்களிலும்,
இளவேனிற் காலத்தில்
காமத்தைச் சீண்டியபடி
கை கோர்த்துச் செல்லும்
கணவன் மனைவியிலும்,
விரைவில் முடியாத
ஒற்றையடிப் பாதைகளிலும்,
திரையரங்கின் ஒளியற்ற
பின்னிருக்கைகளிலும்,
வகுப்பறையின்
கிசு கிசுக்கள் நிறைந்த
வெண் சுவர்களிலும்....
தன்னை
இலவசமாக விளம்பரப்படுத்த
முயற்சிக்கின்றது காதல்!

* * * * *

கவிதை - 02 :
எந்தப் புல்லாங்குழலும்
இசையைத் தனக்குள்
ஒளித்து வைத்திருப்பதில்லை.
உன் உதடுகள்
எந்த முயற்சியும் எடுக்காதவரை...
அவை வெறும்
மூங்கில் துண்டுகள் தான்!

* * * * *

கவிதை - 03 :
என்னுடைய
எந்தக் கவிதையை விடவும்
மிகவும் சிறப்பானது
எதுவும் எழுதப்படாத
ஒரு வெற்றுத்தாள்.

.
.

சின்னச் சின்னக் கவிதைகள்

2011-12-20T21:24:00.000+05:30

தொட்டதும் அதிர்கிறேன்.

மின்னாலும்,

உன்னாலும்!

கூந்தலைப் பரப்பிவிட்டாய்.

மிரண்டுபோய்

ஒளிந்துகொண்டது

இரவு.

தேன் தொட்ட பலாச்சுளைகள் -

உன் மேலுதடும்,

கீழுதடும்.

நீ என்னை

அலங்கரிக்கின்றாய்...

ஞாபகத்தில் வந்து நின்றது

நேர்ந்துவிட்ட ஆடு.

இக்கணமே செத்துப்போவோமா

என்கிறாய்...

வாழ்ந்துவிட்டுப் போகட்டுமே

நம் உடல்கள்!

எந்தப்பூக்களும்

தங்களைத் தாங்களே

பிய்த்துக் கொள்வதில்லை.

காதலில் மட்டும்தான்

அப்படிச் செய்வதற்கும்

அனுமதியட்டை கிடைக்கின்றது!

நிராகரிக்கப்பட்டவனின் உணவுத்தட்டு

2011-12-12T11:12:00.001+05:30

உனக்கு என்னிடம் பிடித்ததே
எதற்கும் இணங்கும்
இந்த மௌனம் தான் என்று
தெரிந்ததும்
விழுந்து உடைந்தன -
உனக்காக
சேர்த்து வைத்திருந்த
யேர்மன் தேசத்து
வார்த்தைக் கண்ணாடிகள்!

நான் கவிதைகளின்
காதலன்.
நீயோ கடனட்டைகளின்
சேமிப்பகம்!
உனக்கு கவிதை பிடிக்காது
என்பதற்காக
நான் குற்றவாளி
என்று அர்த்தமில்லை!

நிராகரிக்கப்பட்டவனின்
உணவுத்தட்டிலிருந்து
இத்தாலிய உணவுகளை
எதிர்பார்க்கும் பெண்ணே!
எதிர்பார்த்தது கிடைக்காவிட்டால்
எட்டியா உதைவாய்?
சரி, உன்னை என் குழந்தையாக
ஏற்றுக்கொள்கிறேன்.
காறித் துப்புகிறாயே!
பரவாயில்லை,
உன்னை கடலலையாக
நினைத்துக் கொள்கிறேன்.

ஒரு கணம் நின்று கேள்!
நிராகரிக்கப்பட்டவனின்
உணவுத்தட்டென்பது
எதிர்பார்ப்புக்களால் மலம் களிக்கப்பட்ட
ஏமாற்றத்தைத் தவிர வேறெதுவுமல்ல!

.
.

வாழ்க்கை எனும் சூத்திரம்

2011-12-11T07:12:00.001+05:30

மக்கு மனிதா!
சொர்க்கம் என்று நிச்சயமாக
எதுவுமில்லை.
அது இங்கே தான் இருக்கிறது....
சிலருக்கு போதையின் வடிவில்
( மண் போதை, மது போதை,
பண போதை, பதவி போதை,
பெண் போதை, பொன் போதை
எல்லாமும் தான்......)
சிலருக்கு காதலின் வடிவில்,
சிலருக்கு காரின் வடிவில்,
சிலருக்கு i-phone இன் வடிவில்,
சிலருக்கு android இன் வடிவில்..........
ஆசைப்பட்டதை அடைந்துவிட வேண்டும்.
எப்படி?
நியாயமாக ஆசைப்பட்டு,
நேர்மையாக அடைந்துவிட வேண்டும்.

வாழ்க்கை எனும் சூத்திரத்தில்
குழம்பிக்கொள்ள எதுவுமில்லை.
அதை இலகுவாக்க ஒரே வழி -
தலைகீழாக வைத்துப்படிக்கும்
சூத்திரத்தை
நேராக வைத்துப்படியுங்கள்
அவ்வளவே!

நாளைக்கு உண்பதற்காக
இன்றைக்குப் பட்டினி கிடப்பதில்
அர்த்தம் இல்லை.
இளமையை
சேமிக்கப் பயன்படுத்திவிட்டு,
முதுமையில் எதையும்
செலவழிக்கப் போவது கிடையாது!
கால இயந்திரம்
கண்டுபிடிக்கப்படும் வரை
இறந்த காலத்தை மீண்டும் வாழ்வது
இப்போதைக்கு சாத்தியமில்லை.
மறந்துவிடாதீர்கள்!

இன்பமுற வாழுங்கள்....
பால் போல நுரைக்க நுரைக்க,
மூங்கில் போல தழைக்கத் தழைக்க!

.
.

prof. Stephen Hawking என்னும் வாழும் அதிசயம்!

2011-12-07T20:42:00.001+05:30

ஜனவரி 8, prof. Stephen Hawking அவர்களது 70தாவது பிறந்த தினம், அவரை மனதார வாழ்த்திச் சிறப்பிக்கும் முகமாக பகிரப்படும் பதிவு இது.
Happy Happy Birthday Dear Stephen Sir............ (:-D)

அறிவியலில் ஆர்வமுள்ளவர்களிடம், “இந்த நூற்றாண்டின் மிகச் சிறந்த விஞ்ஞானி யார்?” என்று கேட்டால், தயங்காமல் சொல்வார்கள் ஸ்டீபன் ஹௌகிங் (pro. Stephen W. Hawking) என்று. இத்தனைக்கும் அவர் ஒன்றும், ஹொலிவூட் படங்களில் வரும் விஞ்ஞானிகளைப் போல விசில் அடித்தபடி, ஒற்றைக் கையால் கார் ஓட்டுபவரோ அல்லது தனது வசீகரிக்கும் பேச்சாலும் கவர்ந்திழுக்கும் கண்களாலும் பெண்களை தன் வலையில் விழ வைப்பவரோ அல்ல. அவரை முதன் முதலில் பார்க்கும் யாரையும் பரிதாபப்பட வைக்கக் கூடிய நிலையில் இருப்பவர். ஆம், உண்மையில் அவர் ஒரு நோயாளி!.

அவர் ALS/MND எனப்படும் நரம்பியல் நோயால் பாதிக்கப்பட்டவர். இங்கு ALS என்பது Amyotrophic Lateral Sclerosis இனையும், MND என்பது Motor Neurone Disease என்பதையும் குறிக்கின்றது. இந்த நரம்பியல் நோயால் வருடந்தோறும் உலகம் முழுவதும் 350,000 பேர் பாதிக்கப் படுவதாகவும், 100,000 பேர் இறந்துபோவதாகவும் International Alliance of ALS/MND Associations http://www.alsmndalliance.org/ கூறுகின்றது. அந்த நோயைப் பற்றிக்கூறுவதானால், அந்த நோய் வந்தவர்களால் எழுந்து நடமாட முடியாது, சக்கர நாற்காலிதான் கதி. கை, கால்களை செயற்படுத்த முடியாதபடி முடக்கி விடும். பேச முடியாது, உணவை தாமே உண்ண முடியாத நிலை. கண்கள் மட்டுமே அசையும், மூளை இயங்கும். தங்களின் ஒவ்வொரு அசைவிற்கும் அடுத்தவரை முற்றுமுழுதாக நம்பியிருக்க வேண்டிய பரிதாபகரமான நிலை! எதிரிக்கும் வரக்கூடாத நிலை. இதனால் மனிதர் சோர்ந்து விட்டாரா என்று கேட்டால், இல்லை என்றே அவர் சாதனைகள் அடித்துச் சொல்லும். தன்நம்பிக்கையில் மனிதர் அசகாய சூரர்!

என்னைப் போல பலரும் அவரை பிரமிப்புடன் பார்ப்பதற்கு காரணங்கள் ஏராளம் உண்டு. மிக முக்கியமானது யாதெனில், 1988 ம் ஆண்டு, முட்டாள்கள் தினத்தில் வெளியிடப்பட்ட A Brief History of Time எனும் அவரது புத்தகம் தான். உலகையே புரட்டிப்போட்ட புத்தகம் அது. வெளியிடப்பட்ட நாள் முதல் விற்பனையில் சாதனை படைத்து, அதிகளவான பிரதிகள் விற்கப்பட்டதுடன், 40 பிற மொழிகளிலும் மொழி பெயர்க்கப்பட்ட புத்தகம் அது. அந்த ஒரு புத்தகம் மூலம் உலகையே ஒரு கணம் ஸ்தம்பிக்க வைத்து, தான் யார் என்பதை இந்த உலகுக்கு காட்டினார் ஸ்டீபன்.

அந்தப் புத்தகத்திலே அவர்,
காலம் மற்றும் வெளி, விரிவடையும் பிரபஞ்சம், இயற்கையின் ஆதார விசைகள், Black Holes எனப்படும் கருந்துளைகள், பிரபஞ்சத்தின் உருவாக்கம், Worm Holes எனப்படும் புளுத்துளைகள் மற்றும் காலப்பயணம், Theory of Everything என்பவற்றை ஆராய்ந்து கட்டுரையாக எழுதியிருந்தார். அது முதற் கொண்டு, அவர் சொல்பவற்றை இந்த உலகமே செவிமடுத்துக் கேட்க ஆரம்பித்ததோடு, அவரை ஐன்ஸ்ரினுக்குப் பிறகான சிறந்த பௌதிகவியலாளராகவும் ஏற்றுக் கொண்டது.
இன்றுவரை அவர் பல புத்தகங்கள் மற்றும் கட்டுரைகளை வெளியிட்டும், கல்லூரிகளிலும் பல்கலைக்கழகங்களிலும் சொற்பொழிவுகளை ஆற்றிய படியும், தொலைக்காட்சிகளில் நிகழ்ச்சியை வழங்கியும் பௌதிகவியலிற்கு பெரும் பங்காற்றிவருகிறார். இன்றைய சந்ததியினர் மத்தியிலும் அவர் வெளியிட்டு வரும் வேற்றுக்கிரக வாசிகள் மற்றும் காலப்பயணம் பற்றிய கருத்துக்கள் வெகு பிரசித்தம் வாய்ந்தவை.

ஸ்டீபன் ஹௌகிங்கின் வரலாற்றுத் துளிகள் சில :-

பிறப்பு :

ஜனவரி 08, 1942ம் ஆண்டு, இங்கிலாந்திலுள்ள ஒக்ஸ்போர்ட் நகரில். சரியாக கலிலியோ கலிலி இறந்து 300 ஆண்டுகள் கழித்து!

கல்வி :

11ம் வயதில் St. Albans School பின் University College, Oxford. ஹௌகிங் விரும்பியது கணிதம் பயில, அவர் தந்தை பயிலச் சொன்னது வைத்தியம். ஆனால் University College இல் கணிதம் இல்லாததால் அவர் தெரிவு செய்தது பௌதிகவியல்! யார்யாருக்கு என்ன தேவை என்று இயற்கைதான் தெரிவு செய்கிறது போல....

3 வருடங்கள் கழித்து, அதிகம் அலட்டிக்கொள்ளாமலேயே, இயற்கை விஞ்ஞானத்திற்காக first class degree ஒன்றைப் பெற்றுக் கொண்டார்.

பின்னர், பிரபஞ்சவியலை அதுதான் cosmology ஐப் பற்றி ஆராய கேம்பிரிட்ஜ் சென்றார். ஆனால் அந்த வேளை, அந்தத் துறையில் ஆராய்ச்சி செய்ய அங்கு யாரும் இல்லை. எப்படி இருப்பார்கள்?

தனது Ph.D ஐப் பெற்றதுடன் Gonville மற்றும் Caius College களில் முதலில் சக ஆராய்ச்சியாளராகவும், பின்னர் தொழில் ரீதியான முனைவராகவும் ஆனார்.

1973 ல் Institute of Astronomy (வான சாஸ்திரத்திற்கான கல்வி நிறுவனம்) ஐ விட்டு விலத்தி, 1979 ல் Department of Applied Mathematics and Theoretical Physics (பிரயோக கணிதம் மற்றும் கோட்பாட்டு பௌதிகவியலுக்கான துறை) இற்கு வந்தார்.

அத்துடன் 1979 முதல் 2009 வரை Lucasian Professor of Mathematics என்ற பதவியையும் வகித்தார். இந்தப் பதவியானது, 1663 இல் Henry Lucas என்பவரால் தோற்றுவிக்கப்பட்டது. இந்தப் பதவியானது முதன் முதலில் Isaac Barrow என்பவராலும் பின்னர் 1669 ல் Isaac Newton ஆலும் வகிக்கப் பட்டிருந்தது. ஆமாம் அப்பிள் பழம் திடீரென்று தலையில் விழுந்ததால், அதன் மேல் கடுப்பாகி புவியீர்ப்பைக் கண்டுபிடித்த அதே Isaac Newton தான்.

தற்போது Cambridge இல் உள்ள DAMTP ல் கோட்பாட்டுப் பிரபஞ்சவியலுக்கான நிலையத்தில் ஆராய்ச்சி இயக்குனராகப் பணியாற்றுகின்றார். ( Director of Research at the centre for Theoretical Cosmology, at DAMPT in Cambridge )

வாழ்க்கை :
மனைவி மற்றும் பிள்ளைகள் தன்னை விட்டுப் பிரிந்து சென்றாலும், தன்னை அன்பாக நேசித்துப் பாசத்துடன் கவனித்துக் கொண்ட தாதியை திருமணம் முடித்து சந்தோசமாக வாழ்ந்து வருகிறார்.

அவர் இன்னும் பல காலம் சிறப்பாக வாழ்ந்து, எதிர்கால சந்ததியினருக்கும் தனது அறிவை வாரி வழங்க வேண்டும் என்று இயற்கையை மனதார வேண்டிக்கொள்வோம்.

*மேலதிக விரிவான தகவல்களுக்கு விக்கிப்பீடியாவில் http://en.wikipedia.org/wiki/Stephen_William_Hawking

* Discovery Channel இல் அவர் வழங்கிய நிகழ்ச்சிகளைக் காண http://dsc.discovery.com/tv/stephen-hawking/

.
.

மனதில் பட்டவை - 2

2011-12-05T13:38:00.001+05:30

நாம் எல்லோரும் பைனாகுலர் பயன்படுத்தும் போட்டி ஒன்றில் பங்குபற்றிக் கொண்டிருக்கிறோம். நம் எல்லோரிடமும் விலை கூடிய, அழகான பைனாகுலர் ஒன்று தரப்பட்டிருக்கின்றது. அதை புத்திசாலித் தனமாகப் பயன் படுத்தி வெற்றி பெறாமல், தேவையில்லாத அற்ப விடயங்களில் எல்லாம் நாம் அந்த பைனாகுலரை பெருப்பித்தும், கிட்டவாக்கியும் பார்த்துக் கொண்டு இருக்கிறோம். அநத் பைனாகுலரைத் திருப்பி, அதன் மற்றைய பக்கத்தால் பார்க்கும் போது, அது காட்டும் பொருள் சிறிதாகவும், தூரத்திலும் தெரிவதை பெரும் பாலும் மறந்து விடுகிறோம். அப்படி மறந்து விடுபவர்களில் பலர் இந்தப் போட்டியில் தோற்றும் விடுகிறார்கள்.

அந்த பைனாகுலரின் விஞ்ஞானப் பெயர்................வாழ்க்கை!

ஓடும் நீர் ஆவியாகி மேலெழுவதும், அந்த நீராவி மழையாகி நிலத்தில் பெய்து மீண்டும் ஓடும் நீருடன் சேர்வதும், அதன் ஒரு கிளை தனியாகச் சென்று உறைந்து போய் பனிக்கட்டி ஆவதும் வாழ்க்கை வட்டத்தின் இயல்பு நிலைகள். என்ன இந்த நீர் நமக்கு அடங்காமல், கட்டுப்பாடுமில்லாமல் இரைச்சலுடன் ஓடிக்கொண்டிருக்கிறதே என்று ஆத்திரப்படுவதில் எந்த அர்த்தமும் இல்லை. ஓடுவதால் தான் அது நன்நீர். தேங்கி நின்றால் அதன் பெயர் சாக்கடை!

* *

எல்லோருக்கும் தாங்கள் செய்யும் செயலுக்கு தனிப்பட்ட காரணங்கள் இருக்கிறது, கருத்துக்கள் இருக்கிறது. அதை வெளிப்படுத்த சந்தர்ப்பம் வழங்க வேண்டும். அவர்கள் பேச வேண்டிய இடைவெளிகளை உங்கள் வார்த்தைகளால் நிரப்பாதீர்கள். Don't full fill theirs socks with your bloody legs. உண்மையான குற்றவாளிகளுக்கும் நீதி மன்றத்தில் தங்களை நியாயப்படுத்த ஒரு வாய்ப்பு வழங்கப் படுகிறது என்பதை நினைத்துப் பாருங்கள்!

* * *

குறுக்கு வழிகளில் பணம் பார்த்து, தங்கள் குற்றங்களை மூடி மறைத்து சமூகத்தில் தங்களையும் பெரியவர்களாகக் காட்டிக் கொள்பவர்களைப் பற்றிப் பேச எதுவும் இல்லை! பணமும் இளமையும் இருக்கும் வரை வாழ்க்கை இனிமையானது போலத்தான் தெரியும். நேர்மையானவர்களை பிழைக்கத் தெரியாதவர்கள் என்று கேலியும் செய்வார்கள். ஆனால், எதிர்காலத்தில் ஏதாவதொரு வாழ்கைப் புள்ளியில், ஏன் இப்படி வாழ்ந்தோம் என்று அவர்கள் வருத்தப் படுவார்களேயானால், அதுவரை காலமும் அவர்கள் வாழ்ந்து வந்த வாழ்க்கை மொத்தமும் அர்த்தமற்றதாகிப் போய்விடும்.

* * * *

வீட்டுப் பூனை முற்றத்தில் தவறி விழும் குருவிகளை அடித்துத் தின்பதில் இப்போதெல்லம் எனக்கு எந்த ஆட்சேபனையும் இல்லை. ஆரம்பத்தில் தடுக்கவும் செய்தேன். ஆனால் இப்போது அப்படியில்லை. பூனையின் உணவுச் சங்கிலியில் குருவியும் உண்டல்லவா! இயற்கையின் விதிகளை நாம் மீறக்கூடாது. தகுதியுள்ளவை தப்பிப் பிழைக்கும் என்பது தானே இயற்கையின் நியதியும் கூட. குருவிக்கு இறக்கையும் பூனைக்குப் பற்களுடன் கூடிய பசியும் இருக்குமாறு இயற்கை பார்த்துக்கொண்டதில் அர்த்தம் உள்ளது.

* * * * *

நாம் எல்லோருமே ஏதோ ஒரு வகையில் மன நோயாளிகள் தான். நம் எல்லோருக்குள்ளும் ஒரு வன்முறையாளன் இருக்கிறான். அவன் எப்போதும் தன்னைவிட வலிமை குறைந்த, பலவீனமான, தன்பேச்சைக் கேட்கக்கூடிய ஒருவனை, குரூரமாக ரசித்து வீழ்த்தி, இரத்தத்தைப் பார்த்துப் பேரின்பம் காண தேடிக்கொண்டிருக்கிறான். அப்படி ஒருவன் கிடைத்தவுடன் அந்த வன்முறையாளன் வெளியே வரவிரும்புகிறான்! நல்ல வேளையாக நாகரீக முன்னேற்றம், கல்வி வளர்ச்சி மற்றும் சட்டதிட்டங்களின் காரணமாக, அந்த வன்முறையாளனை நாம் பெரும்பாலும் கட்டுப்படுத்தி விடுகிறோம். ஆனாலும் ஏதோ ஒரு புள்ளியில், ஏதோ ஒரு சந்தர்ப்பத்தில் அந்த வன்முறையாளனை வெளியே விட்டு ஆசையைத் தீர்த்துக்கொள்கிறோம்.

உதாரணமாக சொல்வதானால், தினம் செய்திகளில் வருபவை தான், மருமகளை எரிக்கும் மாமியார், மனைவியின் களுத்தை வெட்டும் கணவன், குழந்தையை சலவை இயந்திரத்திற்குள் போடும் தாய், தற்கொலை குண்டுதாரிகள், போர் வீரர்கள் இப்படி ஏராளம்.......

ஒருமுறை கோழி வெட்டும் கடையில் போய் நின்று பாருங்கள், அங்கே கோழி வெட்டுபவர், அந்தக் கோழி கதறக் கதற, அதன் களுத்தை அறுக்கவும், அதன் சூடான இரத்தம் அவர் கையில் பட்டவுடன், அவரின் விரல்கள் விழித்துக் கொண்டு, அந்தக் கோழி துடிக்கத் துடிக்க, அதன் இறக்கையை குரூரமாக பிய்த்தெடுக்கும். பின் அதன் நெஞ்சைப் பிளந்து, அதன் துடித்துக்கொண்டிருக்கும் இதயம்,சூடான ஈரல் என ஒவ்வொரு உறுப்பாக அறுத்து.................... நாமும் அதை இரசிக்கவே செய்வோம். ஒரு முறை youtube இல் போஸ்மார்ட்டம் செய்வதை ஆவலுடன் பார்த்தேன். எனக்குள்ளிருக்கும் வன்முறையாளனை உணர்ந்து கொண்டதும் அப்போதுதான்! உங்களில் ஒவ்வொருவரும், இப்படி ஏதாவதொரு கணத்தில் உங்களுக்குள் இருக்கும் அந்த வன்முறையாளனை உணர்ந்திருப்பீர்கள், மறைக்காமல் நேர்மையுடன் ஒத்துக்கொள்ளுங்கள்!

.
.

காதல் படிக்கட்டில்

2011-11-28T20:46:00.001+05:30

(பாடலை சந்தத்துடன் படிக்கவும்...: ரானா ரனனானா, ரா ரனனன ரானானா... )

ஆண் குரலில் :

காதல் படிக்கட்டில்
நான் கடைசியில் நிற்கின்றேன்.
என்னைக் கடந்து செல்லும் பெண்பூவே!
கவனிக்க மாட்டாயா?
என் கண்களைப் பாரம்மா.
இந்தக் கவிதையைக் கேளம்மா...
காதல் என்றால் கொடுமையல்ல
புரிந்து கொள்ளம்மா.

வகுப்புக்கு நீ வருவாய்.
என்னை விட்டு
தூரத்தில் போய் அமர்வாய்.
இந்த இடைவெளி அளவு
குறையாவிட்டால்
கணிதமும் கசந்துவிடும்.

மலர்களை விரும்புகிறாய்
அதை முள்ளுடன் பறிக்கின்றாய்.
முள் நான், மலர் நீ
சேர்ந்தே இருக்கணும்
விளங்கிக் கொள்வாயா?

இந்தக் காதல் தவிக்கும்படி
உன் கண்களும் பழிக்குதடி.
நிலவொளி என்பது
முற்றத்தில் விழுவது
கால்கள் மிதிப்பதற்கா?.

என் கூடவே வருகின்றாய்.
பேரூந்தின் பாடல்கள் இரசிக்கின்றாய்.
அதில் என் பெயர் கேட்டதும்
உன் முகம் சிவந்ததை
என்னிடம் மறைக்காதே!

அடி வெல்வெட் துணித்துண்டே!
என்னை வெறுப்பதாய் நடிக்காதே!
உன் உதடுகள் சொல்வதும்
இதயம் நினைப்பதும்
நிச்சயம் ஒன்றல்ல.

உன் கைவிரல் அணைப்பிற்குள்
தங்க மோதிரம் துயில்கிறதே...
அதில் உன் பெயர், என் பெயர்
உற்பத்தியானால்
உயிரும் பூரிக்கும்.

என்னை ஏற்றுக்கொள்வாயா?
உன் மனசின் உரிமம் தருவாயா?
அடி ஈருடல் ஓருயிர்
உண்மையானால்
காதலும் சிறக்குமடி!

காதல் படிக்கட்டில்
நான் கடைசியில் நிற்கின்றேன்.
என்னைக் கடந்து செல்லும் பெண்பூவே!
கவனிக்க மாட்டாயா?
என் கண்களைப் பார்த்தாயே.
இந்தக் கவிதையைக் கேட்டாயே...
காதல் என்றால் கொடுமையல்ல
புரிந்து கொண்டாயா?

.
.

ஒரு தபுதாரனின் தவிப்பு

2011-11-27T18:41:00.001+05:30

என்ன இந்த வாழ்க்கை
ஏன் இப்படிக்கொல்கிறதோ...
காதலித்த மனைவியை
காலனிடம் இழந்தவர்களுக்கு
வெற்றுச் சுவரை விட
வேறு மார்க்கமேயில்லையா?

வேலை விட்டால் வீடு
வீடு விட்டால் வேலை என்று
சுருங்கிவிட்ட வாழ்க்கை.
நீ அதிகம் விரும்பிய
மழையையோ, மலர்களையோ
கடற்கரையையோ, காதல்பாடல்களையோ
அனுமதிக்காத வாழ்க்கை.
வேலை நேரம் கழிந்து
எஞ்சிய வாழ்க்கையை
வீடு முழுக்க விரவியிருக்கும்
உன் அடையாளங்களும்
அவை கொண்ட
நினைவுகளும் தின்கின்றன!
சனி, ஞாயிறு, விடுமுறை தினமோ
இன்னும் மோசம்
இன்னும் மோசம்!

காலையில் தரையிலிருந்து
என்னை எழுப்பிவிட்டு,
குளிக்கும் போதும்,
குடிக்கும் போதும்,
சமைக்கும் போதும்,
சாப்பிடும் போதும்,
துவைக்கும் போதும்,
உலர்த்தும் போதும்,
படிக்கும் போதும்,
சுவரை வெறித்துப்பார்க்கும் போதும்
கூடவே இருந்துவிட்டு...
பிந்திய இரவில் தவறாமல்
கண்ணீருடன் தூங்க வைக்கிறது தனிமை.

நீ அடம்பிடித்து வாங்கிய கட்டில்,
ஆசையாய் மீட்டும் வயலின்,
நமக்குள் பரிமாறிக்கொண்ட பரிசுகள்,
மௌனத்தைப் பேசும்
உன் சோடிக்கொலுசுகள்,
காதல் சொட்டச் சொட்ட
அனுபவித்து வாழ்ந்த
நம் அந்தரங்க அறையையும்
காலையில் எழுந்ததும்
திறந்துபார்ப்பேன்...
அந்த அறை முழுதும்
நிறைந்திருக்கும் உன் வாசமும்,
உன் நினைவுகளில் கலந்திருக்கும்
இளஞ்சூடுமே
அன்று முழுவதும்
என்னை உயிர் வாழச்செய்கிறன.

இப்போதெல்லாம்...
இன்னும் நீளாதா என ஏங்க வைத்து
விரைந்து மறைந்த மாலை வேளைகள்
நகரவே மறுக்கின்றன!
நீ அருகில் இருக்கையில்
இனிமையை அள்ளித்தெளித்த
பௌர்ணமி இரவுகள்...
இரக்கமென்பதையே மறந்து விட்டன!

ஒரு தாயைப்போல பாசமாக
தலை வருடி
என்னை மீண்டும் குழந்தையாக்குவாயே
அந்த கை விரல்கள் எங்கே?
நான் ஆசையாய் சாய்ந்து
அங்கலாய்க்கும் தோள்கள் எங்கே?
என்னிடம் பட படக்கும்
அந்தக் கண்கள் எங்கே?
என்னைச் சீண்டிப் பர்க்கும்
சிரிப்புகள் எங்கே?
அதோடு சேர்ந்து கொள்ளும்
வளையல்கள் எங்கே?
என்னைக் கடிந்துகொள்ளும்
உன் காதல் எங்கே?
என்னிடம் செல்லம் கொஞ்சும்
உன் காமம் எங்கே?
நெஞ்சில் புதைந்து ஆயிரம் கதைகள் பேசி
கொஞ்சிக் குலாவும் அந்த அழகு முகம் எங்கே?
ஆயுள் வரை என்னோடு
இருப்பதாக வாக்குத்தந்த
உன் வார்த்தைகள் தான் எங்கே?

இவற்றை எல்லாம் மறந்தா
உன்னை தீயில் இடச்சம்மதித்தேன்?
ஏன் சம்மதித்தேன்?
நீ பாதியிலேயே விட்டுச் சென்ற கோபத்திலா
அல்லது
நீ மீண்டும் வருவாய் என்கிற நம்பிக்கையிலா?
பேசாமல் அந்தத் தீயிலேயே
நானும் பாய்ந்திருக்கலாம்,
என்னையும் மாய்த்திருக்கலாம்!
இப்போது
கோபமும் தோற்று
நம்பிக்கையும் தோற்று
நடைப்பிணமாய்ப் போயிற்றேன்!

என்ன இந்த வாழ்க்கை
ஏன் இப்படிக்கொல்கிறதோ...
காதலித்த மனைவியை
காலனிடம் இழந்தவர்களுக்கு
வெற்றுச் சுவரை விட
வேறு மார்க்கமேயில்லை!

.
.

தலைவன்

2011-11-26T19:30:00.001+05:30

வசந்தம் வருகிறது
போகிறது...
வரட்சி வருகிறது
போகிறது...
தலைவன்
வருகிறான் போகிறான் ...
எப்போதும் போலவே
மக்கள் -
சிரித்து
அழுது
புசித்து
புணர்ந்து ...
வாழ்கிறார்கள்.
அவர்களில்
நல்லவர்கள், கெட்டவர்கள்
என்பதை
அவரவர் பசியின் அளவே
தீர்மானிக்கிறது.
ஆம் மக்கள் வெறும் மக்கள் தான்!

.
.

கவிதையல்ல!

2011-11-25T11:43:00.001+05:30

உத்தரத்தில் தொங்கும்
பித்தளை வேலைப்பாட்டில்
மயங்குகின்றோம்.
கீழே மிதிபடும்
வைரங்களைக் கவனிப்பதில்லை...

*

இந்த உலகம் -
அழகானவர்களையே எப்போதும்
ஆராதிக்கின்றது.
அவர்களின்
மனங்களின் அழுக்குகள்
மறைக்கப்படுவதால்...

அழுக்கானவர்களையோ எப்போதும்
அவமதிக்கின்றது.
அவர்களின்
மனங்களின் அழகுகளை
மறந்துவிடுவதால்!

*

வாழ்க்கை -
செதுக்கி வைக்கப்பட்டதென்று
யார் சொன்னது?
அது ஒரு
அமைப்பற்ற கூழாங்கல்.
அதை அழகூட்ட முயற்சித்தல்
அபாயம் தரும்!
.
.

வரமாய் வந்த தேவதை

2011-11-21T21:44:00.001+05:30

ஆண் குரல் :

வரமாய் வந்த

தேவதை

நீ குறும்புகள் செய்யும்

தாமரை!

ஈடன் தோட்டத்துப்

பொன்வண்டு

நீ இதயத்தை அரிக்கும்

சில் வண்டு!

கனவுகள் வரைந்த

ஓவியம்

நீ கவிஞர்கள் படைத்த

காவியம்!

மொட்டுக்கள் விழித்து

மலராகும்

உன் கூந்தலின் மென்மையை

களவாடும்!

வரமாய் வந்த

தேவதை

நீ குறும்புகள் செய்யும்

தாமரை!

ஈடன் தோட்டத்து

பொன்வண்டு

நீ இதயத்தில் இனிக்கும்

கற்கண்டு!

உன் உதட்டினில் பிறப்பது

சிறு கவிதை

அது உடனே மறைவது

பெருங்கவலை!

இரவுகள் வருவது

எதற்காக?

உன்னால் பௌர்ணமி தோற்கணும்

அதற்காக!

வரமாய் வந்த

தேவதை

நீ குறும்புகள் செய்யும்

தாமரை!

ஈடன் தோட்டத்து

பொன்வண்டே

உன் இதயத்தில் எனக்கொரு

இடமுண்டா!

நதிக்குள் குதித்தது

நீர்வீழ்ச்சி

அதன் காதல் தோல்விக்கு

நான் சாட்சி!

உன்னருகால் உலகை

அழகாக்க

என் ஆயுள் முழுக்க
நீ வேண்டும்!

வரமாய் வந்த

தேவதை

நீ குறும்புகள் செய்யும்

தாமரை!

ஈடன் தோட்டத்து

பொன்வண்டே

உன் இதயத்தில் எப்போதும்

இடமுண்டே!

* * * * *

உயிருக்குள் நனைகிறேன்

2011-11-19T10:41:00.001+05:30

: ஆண்

இளந்தேனையும் பாலையும்

கலந்து செய்துவைத்த

சிலை நீயோ?

இதமாக இதமாக

என் காதில் இனித்திடும்

இசை நீயோ?

காதலின் தூறலில்

உன் கண்களின் ஈர்ப்பினில்

விரல்களின் ஸ்பரிசத்தில்

உயிருக்குள் நனைகிறேன்.

: பெண்

காதலின் தூறலில்

உன் கவிதையின் ஈர்ப்பினில்

ஆண்மையின் ஸ்பரிசத்தில்

உயிருக்குள் கரைகிறேன்.

: ஆண்

உன்னைப் பார்க்கையில்

ஏனடி என் நெஞ்சில்

இத்தனை படபடப்பு?

உன்னோடு பேசையில்

ஏனடி என் உயிருக்குள்

இந்த சல சலப்பு?

: பெண்

அருகினில் இருக்கிறாய்

அவஸ்தைகள் செய்கிறாய்

என்னையே பார்க்கிறாய்

ஏதோ கேட்கிறாய்.

: குழு

அருகினில் இருக்கிறாய்...
இருக்கிறாய்...இருக்கிறாய்.

அவஸ்தைகள் செய்கிறாய்...
செய்கிறாய்...செய்கிறாய்.

அவளையே பார்க்கிறாய்

என்ன தான் கேட்கிறாய்.

: ஆண்

அதை நான் சொல்லவா?
அதை நான் சொல்லவா?

சொல்லாமல் செல்லவா?
சொல்லாமல் செல்லவா?

: பெண்

சொல்லவே விரும்பினேன்.

சொல்லாமல் செல்கிறேன்.

: ஆண்

இதுதான் காதலா?

: பெண்

இளமையின் மோதலா?

: ஆண்

இருவரின் குழப்பமா?

: பெண்

இதற்கில்லை மோட்சமா?

: குழு

இதுதான் காதலே.

இளமையின் மோதலே.

உங்கள் இருவரின் குழப்பமே.

இதற்கில்லை இங்கு மோட்சமே.

: குழு

இதுதான் காதலே.

இளமையின் சாதலே.

இரு உயிர்களின் குழப்பமே.

இதற்கிணையில்லை எதுவுமே!

லலலா லாலலே
லலலல லாலலே
லல லலலல லலல்லே...

டுடு டூ டூடுடு
டுடுடுடு டூடுடு
டுடு டுடுடுடு டுடுட்டுடூ.

* * * * *

ஹைக்கூவும் விளக்கமும்

2011-11-17T13:47:00.001+05:30

நான் எழுதிய சில ஹைக்கூக்களிற்கான விளக்கங்களை என்னுடைய கோணத்திலிருந்து தர முயற்சிக்கின்றேன். எங்கே வேண்டுமானாலும் தோன்றலாம் ஹைக்கூ. முற்றத்தில், சாலையில், பூங்காவில்,கடற்கரையில், சினிமாவில், காதலியின் மடியில் ... இப்படி எங்கு வேண்டுமானாலும் தோன்றலாம். ஒரு ஹைக்கூவிற்கு இதுதான் சரியான விளக்கம் என்று எதுவும் அமைந்து விடாது. வாசிக்கும் நபர், அவருடைய மனநிலை, அவருடைய வாழ்க்கைச் சூழ்நிலை என்பவற்றைப் பொறுத்து ஒரு ஹைக்கூவினுடைய விளக்கமும் மாறுபடக் கூடியதாக அமையும். நான் தரும் விளக்கத்தில் இன்னொருவருக்கு உடன்பாடு இல்லாமல் போகலாம் அல்லது திருப்திதராமல் விடலாம்; திருப்தி தராது விட்டால் நல்லது. ஹைக்கூவின் தனித் தன்மையே அதுதானே!

கிணற்றைப்போல்
தொட்டிக்குள்ளும்
நிலவு.

விளக்கம் :
அது பௌர்ணமி நிலவு தோன்றும் இன்னுமொரு பிரகாச இரவு. கிணற்றருகில் நின்றுகொண்டு வானம் பார்க்கிறேன். அடடா! என்ன அழகு. அந்த அழகியை தன் அருகினில் வைத்துக் கொள்ள, முப்பது நாட்களாய் வானம் தவமிருப்பது, நிச்சயம் தப்பில்லை. இயல்பாக கிணற்றுக்குள் பார்க்கிறேன், அங்கேயும் நிலவு இன்னும் அழகாய். அருகிலிருக்கும் தொட்டிக்குள்ளும் பார்க்கிறேன், அட! அங்கேயும் நிலவு. தொட்டியின் நீரைத் திறந்து விட, வாய்க்கால் வழியாக நழுவிச் சென்ற நிலவை சட்டென உறிஞ்சிக் கொண்டது வாழைமரம். முழு நிலவிற்காக முப்பது நாட்கள் தவமிருப்பது வானம் மட்டுமல்ல!

2.
முத்தமிட்டாள் காதலி.
எழும்பவேயில்லை
பிணம்.

விளக்கம் :
அது ஒரு கப்பல் விபத்து. அழிவே கிடையாது என்று இறுமாப்புடன் கூறப்பட்ட கப்பல், பனிப் பாறையுடன் மோதுண்டு, இரண்டு துண்டாய் உடைந்தே போனது. உறைய வைக்கும் குளிரில், கடலுக்குள் வீசப்பட்டார்கள் அந்தக் காதலர்கள். காதலன் அக் கப்பலின் மேற் தள வேலைக்காரன், காதலி அங்கே சமையல் செய்பவள். நடுங்கிக் கொண்டிருக்கும் காதலியை, மிதந்து வந்த பலகையில் ஏற்றி அவளைக் காப்பாற்றி விட்டு, அந்தக் குளிரை தாங்க முடியாது உறைந்து சாகிறான் காதலன். கண் விழிக்கும் காதலி, காதனை அன்புடன் முத்தமிடுகிறாள். ஆனால், அவன் எழும்பவேயில்லை! அவர்களது காதல் அற்புதமானது. அவர்களது பெயர் எதிலும் குறிப்பிடப் படவுமில்லை, யாருக்கும் தெரியவுமில்லை. ஆனால் அந்தக் கப்பலின் பெயர் ’டைட்டானிக்’ காக இருக்க வாய்ப்புள்ளது.

3.
விபச்சாரி விரும்பவில்லை.
பல நிறங்களில்
ரோஜாச்செடி.

விளக்கம் :
அவள் ஒரு விபச்சாரி, இரவுத் தொழிலாளி. பகலில் வாழ்வதற்காக இரவில் தன் ஆடை அவிழ்ப்பவள். இரவுகளில் அவள் கசக்கப்படுகிறாள், கடிக்கப் படுகிறாள். சாராய நாற்றம் கொண்ட பற்களால் அவள் உதடுகள் தின்னப் படுகின்றன. அவள் அவற்றை விரும்புவதில்லை. அவளிடம் வரும் எல்லோரும் அவளுக்கு ராஜாதான். ஆனால் எந்த இரவு ராஜாவாலும் அவள் மனுசியாக மதிக்கப்பட்டதில்லை. அவள் மன்மத பீடத்தில் கவனம் கொள்ளும் ராஜாக்களுக்கு அவள் மனதைப் பற்றி எந்தக் கவலையும் இல்லை. பகலில் மட்டுமே அவள் தன் இக்ஷ்டம் போல வாழ்கிறாள். அவளுக்கு ரோஜா வளர்க்கப் பிடிக்கும். அவை அவளை தொந்தரவு செய்வதில்லை.ஒரு நிறத்தில் தான் அத்தனையும் பூக்கின்றன. பல நிறங்களில் உள்ள ரோஜாவை அவள் ஏனோ விரும்பவில்லை!

சுதந்திரதின விழாவில்
வழங்கப்பட்டது
கூண்டிலடைத்த வெண்புறா.

விளக்கம் :
அவ்வருட சுதந்திரதின விழாவை, நாட்டின் சுதந்திரத்திற்காகப் போராடிய தியாகியை, விழா நாயகனாக முன்நிறுத்தி நடாத்திக் கொண்டிருந்தது ஒரு தனியார் நிறுவனம். தியாகியின் சேவை போற்றப்பட்டது, புகழப்பட்டது. விழா முடிவில், வந்திருந்த அனைவருக்கும் பரிசாக கூண்டிலடைத்த வெண்புறா அத்தியாகியின் கையால் பெருமையுடன் வழங்கப்பட்டது. புறா சலனப்படவில்லை. பழகிவிட்டது!

கண்ணாடியில்

அழகி விம்பம்.

எதிர்காலப் பிணம்.

விளக்கம் :

அழகு என்பதே உடற்பொலிவுதான் என்று ஆகிவிட்ட காலமிது. உடல் அழகுக்குக் கொடுக்கும் முக்கியத்துவத்தை யாரும் அக ஒழுக்கத்திற்கு கொடுப்பதில்லை. அந்தரங்க உறுப்புகளின் அளவிற்கும், அமைப்பிற்கும் இருக்கும் சலுகையில், மனதின் ஆழம் அடிபட்டுவிடுகிறது, அங்கீகரிக்கப் படுவதில்லை. கறுப்பென்றால் முகத்தை சுழித்து அருவருக்கும் பெண்களுக்கு (தங்களை அழகிகளாக நினைத்துக் கொள்ளும்) இந்த நாட்டில் பஞ்சமும் இல்லை. அழகு என்பது நிலையானதல்ல, அது ஆபத்தானதும் கூட என்று அவர்கள் உணர்வதற்குள்..........sorry, it's too late. அழகிகளாக இருப்பவர்கள் மூப்படைந்து, தசைகள் சுருங்கி, இறுதியில் இறந்தும் போகிறார்கள். ஆமாம், எங்கே போனது அவர்கள் அழகு?

* * * * *

என் முற்றத்துக் கவிதைகள் - 2

2011-11-10T14:44:00.002+05:30

ஹைக்கூ பகுதி - 2 அனைவரையும் வரவேற்கின்றது. ஹைக்கூ பகுதி - 1 ற்கு இங்கே சொடுக்கவும். http://theruppaadakan.blogspot.com/2011/11/blog-post_07.html .

ஹைக்கூ என்பது வாசிக்கும் ஒவ்வொருவருக்கும், ஒவ்வொரு விதமான அனுபவத்தைத் தரக்கூடியது. ஏதோ வாசிக்க வேண்டும் என்றெல்லாம் வாசிக்கக்கூடாது. அப்படி வாசித்தால், வெறும் வார்த்தைகளாக மட்டுமே கண்ணுக்குத் தெரியும், எதுவும் புரியாது. ஹைக்கூவை மனதால் வாசிக்க வேண்டும். உண்மையில் ஹைக்கூ என்பது பூந்தோட்டத்தில் வீசும் மெல்லிய, இதமான சில்லென்ற காற்றை சுவாசிப்பதைப் போல சுகமான ஒரு அனுபவம். அதனை மெதுவாக, ரசித்துச் சுவைக்கும் போதுதான் அதன் வசீகரத் தன்மையை உணர முடியும்.

தவறாமல் தோற்கடிக்கிறது
எல்லோரையும்
வயிறு.

**

தாய்ப்பாலை
விற்றாள்.
குழந்தைக்கு உணவு.

**

இரவிலும்
குளிக்கின்றாள்
முதிர்க்கன்னி.

**

விளக்கைப்
பற்றவைத்தாள்.
கட்டுமரத்தின் அசைவு.

**

கால மாற்றம்.
பேரூந்தில்
ஜன்னல் தவிர்த்தது.

**

கலைந்தது வானம்.
கிணற்றுக்குள்
வாளி.

**

பூனைப் படத்தை
கொறித்துப்போட்டது
எலி.

**

பேசும் பொம்மை
வைத்திருந்தான்
ஊமைப்பையன்.

**

இருட்டுப் பாதையில்
வழிசொன்னது
அனுபவம்.

**

சிகரட்டில்
இல்லையே
எச்சரிக்கை வாசகம்!

**

உடைந்தது வானவில்
கையில்
சோப்பு நுரை.

**

தலை
குனிந்தது
சலூன் கண்ணாடி.

**

பலகாரப் பரிமாற்றத்தின்
பின்னர்
விலைபேசப்பட்டாள்.

**

சுவற்றில்
கோலம் போட்டது
மழைச்சாரல்.

**

பாலுக்கு அழுதது
விபச்சாரியின்
குழந்தை.

**

குழந்தைப் படங்கள்.
குழந்தை
இல்லாத வீட்டில்.

**

முற்றத்து வெள்ளத்தில்
மூழ்கியது
கப்பல்.

**

இருட்டியதும்
பூத்தன
மின்மினிப் பூச்சிகள்.

.
.

என் முற்றத்துக் கவிதைகள் (ஹைக்கூ தொகுதி)

2011-11-07T21:55:00.001+05:30

ஹைக்கூ என்பது நீண்ட நெடிய வரலாறு கொண்டது. நான் இங்கே அதன் வரலாற்றைப் பற்றிக் கூறப்போவது கிடையாது. அதன் வரலாற்றைப் பற்றி முழுமையாக தெரிந்து கொள்ள இங்கே சொடுக்கவும் http://en.wikipedia.org/wiki/Haiku (நன்றி விக்கிபீடியா)

தமிழில் ஹைக்கூ எழுதுவதற்கு கடைப்பிடிக்க வேண்டிய நியாயமான சில விதிமுறைகளை, மறைந்த எழுத்துலக ஜாம்பவான் சுஜாதா அவர்கள் தனது ஹைக்கூ எழுதுவது எப்படி என்கிற புத்தகத்தில் இலக்கணமாக வகுத்திருப்பார்.

அதாவது, தமிழில் எழுதப்படும் ஹைக்கூ ஆனது :-

சொந்த அனுபவமாக இருக்க வேண்டும் / பார்த்து உணர்ந்ததாக இருக்க வேண்டும்.
மூன்று வரிகளுக்குள் எழுத வேண்டும்.
முதல் இரண்டு வரிகளில் ஒரு கருத்தும், இறுதி வரியில் தொடர் கருத்தும் சொல்ல வேண்டும்.
முடிந்த வரை சுருக்கமாக, அளவில் சிறிதாக இருக்க வேண்டும்.

ஹைக்கூ ஆனது, முதல் வரியும் இறுதி வரியும் ஐந்து வசனங்களையும், நடுவரியில் ஏழு வசனங்களையும் கொண்டதாகவே எழுதப்படுவது வழக்கம். ஆனால் தமிழுக்காக அந்த நியதியை சற்று தகர்க்கலாம்.

அத்துடன் சென்றியு எனப்படும் ஒரு வகையும் உள்ளது. ஹைக்கூ போலவே வடிவம் கொண்டதுடன், அதன் இலக்கணத்திற்கும் உள்ளடங்கக் கூடியது. ஆனால் உள்ளடக்கத்தில் நகைச்சுவையையும், மனித இயல்பு பற்றியும் பிரதானமாகக் கூறவேண்டும்.

என்பதே அவர் வகுத்த இலக்கணமாகும். இதை விட சிறப்பாக யாராலும் விதிமுறைகளை வகுத்து விட முடியாது. எனவே தமிழில் ஹைக்கூ எழுதுபவர்கள் சுஜாதா அவர்கள் வகுத்த விதிமுறைகளுக்கு உட்பட்டு எழுதுவதே ஒரு மகத்தான படைப்பாளிக்கு நாம் செய்யும் தகுந்த மரியாதை ஆகும்.

***

இனி என்னுடைய ஹைக்கூ மற்று சென்றியு கவிதைகள் ......

வாடவில்லை.

மேசையில்

கடதாசிப்பூக்கள்

விதைக்காமல்

பழுத்தது

நிலவு

தினம் புலம்பெயர்வால்

முகவரி தேடுகிறது

மேகம்

நாய்கள் குரைக்கவில்லை.

பாதையில்

இராணுவம்

சாயம் போகாமல்

நனைந்தது

வானவில்

ஏன் உடல் இளைத்தாய்?

வயதான

கருவாடே!

கண்ணாடியில்
அழகியின் விம்பம்.

எதிர்காலப் பிணம்!

எதிரிக்கு வாழ்த்து அட்டை.

ஒட்டவில்லை

முத்திரை

முத்தமிட்டாள் காதலி.

எழும்பவேயில்லை

பிணம்

பச்சைக் குழந்தை போல்

உள்ளாடை அணிவதில்லை

வெங்காயம்

என் மனத்திரையில்

உன் நினைவலைகளாக

காதல்

ஒரு காலை வேளை

பல் துலக்கப்பட்டது

சீப்பு

சுதந்திரதின விழாவில்

வழங்கப்பட்டது

கூண்டிலடைத்த வெண்புறா

சீக்கிரம் எழுந்து கொள்.

இன்றுனக்கு

தூக்கு.

உலக வர்த்தக மையம் முன்னால்

என்னைக் கைது செய்தது

உன் புன்னகை

இடுப்பைப் பிடிக்கையில்

சிலிர்க்காதே

வெண்டிக்காயே!

சட்டெனக் குதித்தது

நதிக்குள்

நீர் வீழ்ச்சி

விபச்சாரி விரும்பவில்லை

பல நிறங்களில்

ரோஜாச் செடியை.

கிணற்றைப்போல்

தொட்டிக்குள்ளும்

நிலவு.

ஓ நயாகரா!

என்னை நனைத்தது

கண்ணீர்.

ஆங்கிலத்தில் பேச சில எளிய வழி முறைகள் :

2011-11-06T14:23:00.000+05:30

தற்காலத்தில் ஆங்கில மொழியின் அவசியத்தையோ அல்லது அதன் ஆதிக்கத் தன்மையையோ யாருக்கும் சொல்லித் தெரிய வேண்டியதில்லை. உலகத்தை சிறிய கூடைப்பந்தின் அளவிற்குச் சுருக்கி விட்ட இந்தக் கணினி கணத்தில், செவ்வாய்க்கு ரோவரை (Rover) அனுப்பும் விஞ்ஞான யுகத்தில், ஆங்கில மொழியின் சேவை அளப்பரியது; அதன் தேவை அளவிட முடியாதது. உலகத்தின் மொழியாகவும், நவ நாகரீகத்தின் வழியாகவும் ஆங்கிலம் பார்க்கப்படுவதில் யாருக்கும் மாற்றுக் கருத்து இருக்கப்போவதில்லை.

பெரும் பாலான வளர்ந்த நாடுகளில் ஆங்கில மொழியானது தாய் மொழியாக அல்லது அரச கரும மொழிகளில் ஒன்றாக இருப்பதில் ஆச்சரியமேதுமில்லை. ஆனால் எம்மைப் போன்ற வளர்ந்து வரும் நாடுகளில் தான் ஆங்கில மொழி கற்றல் பற்றிய பிரச்சினையே எழுகின்றது.

ஆம், எம் போன்ற நாடுகளில் ஆங்கில மொழி அரச கரும மொழிகளில் ஒன்றாகவே உள்ளது. அரசாங்கத்தின் மூலம் நாட்டில் ஆங்கில மொழியை வளர்ப்பதற்கான வேலைத்திட்டங்கள் மேற்கொள்ள ப்படுகின்றன. ஆனால் அவை நாட்டின் எல்லாப் பகுதியினரையும் சென்றடைகின்றதா என்றால், பதில் கேள்விக் குறியே!

நகரங்களைப் பொறுத்தவரை, அனைத்து வித வளங்களும் உட்ச பட்ச அளவில் கிடைப்பதாலும், ஆங்கிலத்தில் பேசுவது மேல் தட்டு மக்களால் நாகரீகமாகக் கருதப்படுவதாலும், அங்கே ஆங்கில மொழியின் பிரயோகம் தரமானதாக இருப்பதில் ஆச்சரியம் ஏதும் இல்லை. அதற்காக, நகரங்களில் வாழும் எல்லோருமே ஆங்கிலத்தில் புலமை வாய்ந்தவர்கள் என்று அர்த்தமும் இல்லை.

இதை விட, பொருளாதாரத்தில் பின் தங்கிய மாவட்டங்கள் மற்றும் கிராமங்களில் ஆங்கிலத்தின் நிலை இன்னும் மோசம். இவற்றுக்கான காரணங்களில் முக்கியமாக இருப்பது யாதெனில், ஆங்கிலம் பேசத்தெரிந்தவர்கள் அதனை இன்னுமொரு மொழியாகவே பார்க்கின்றனர். ஆனால் ஆங்கில மொழி தெரியாதவர்களோ அதனை ஒரு உன்னத திறமையாகவே பார்க்கின்றனர். அது மிகவும் பிழையான ஒரு கருதுகோள். மொழி என்பது கண்டுபிடிக்கப் பட்டதே தொடர்பாடலை இலகுவானதாக ஆக்குவதற்கு மட்டுமே.

ஆங்கிலம் கற்பதில் உள்ள அடிப்படைத்தவறு :

நன்றாக ஞாபகப்படுத்திப்பாருங்கள், உங்கள் தாய் மொழியை அது எதுவாக இருப்பினும், உங்கள் குழந்தைப் பருவத்திலிருந்து எவ்வாறு கற்க ஆரம்பிக்கின்றீர்கள்?

ஆம், முதலில் அந்தமொழியைக் கேட்பதன் மூலம் (Listening) அந்த மொழியுடன் ஒரு பரிச்சயம் ஏற்படுத்திக் கொள்கின்றீர்கள். பின்னர் கேட்ட வார்த்தைகளை அடிப்படையாக வைத்துக் கொண்டு, ஒவ்வொரு சொல்லாக, மழலை மொழியில், பல வேளைகளில் தவறுதலாகவும் பேச ஆரம்பிக்கின்றோம் (Speaking). பின்னர் எழுதவும் (Writing), இறுதியாக வாசிக்கவும் (Reading) பழகுகின்றோம். அதுவே ஒரு மொழியைக் கற்பதற்கான இயல்பான முறையாகும். அதனால் தான் எமது தாய் மொழியில் எம்மால் அவ்வளவு பரிச்சயமாக இருக்கமுடிகின்றது. ஆனால் ஆங்கில மொழியையும் நாம் அப்படித்தான் இயல்பாகக் கற்கின்றோமா என்றால், பெரும்பாலும் அதற்கான பதிலை இல்லை என்றுதான் கூற வேண்டும்.

ஏனென்றால் நாம் ஆங்கிலத்தை மிகப்பிழையான முறையிலேயே கற்கின்றோம் முக்கியமாக கற்பிக்கப்படுகின்றோம்.

ஆங்கிலமொழி கற்றல் மற்றும் கற்பிற்பதில் உள்ள மேலதிக தவறுகள் :

ஆங்கிலம் பேச வேண்டும் என்கின்ற ஆசையில், தனியார் கல்வி நிறுவனங்களின் அதீத விளம்பரங்களில் ஏற்படும் ஈர்ப்பின் காரணமாக, அவற்றை எல்லாம் உண்மை என்று நம்பி Spoken English Class களில் போய் சேர்ந்து கொண்டு பணத்தை வாரி இறைக்கின்றோம். அங்கே கற்பிக்கப் படுவதெல்லாம் English Grammar மட்டுமே.

(எத்தனை பேர் ஆங்கில ஒலி உச்சரிப்பு முறைகள் பற்றிச் சொல்லித்தருகின்றனர்?) படித்து முடித்து வெளியே வரும்போது, எத்தனை பேர் ஆங்கிலத்தில் பேசக் கூடியவர்களாக வெளியே வருகின்றோம்?

இந்த நிலைக்குக் காரணம் ஒன்றுதான். அதாவது ஆங்கிலத்தை நாம் தலை கீழான முறையில் கற்கின்றோம். Listening > Speaking > Writing > Reading என்ற வரிசையில் கற்காமல், பெரும்பாலும் Writing மற்றும் Reading உடன் நிறுத்திக்கொள்கின்றோம். ஆங்கிலத்தை செவிமடுத்துக் கேட்பதும் இல்லை, பேச முயற்சிப்பதும் இல்லை. பின்னர் எப்படி ஆங்கிலத்தில் தேர்ச்சி பெறுவது??

ஆங்கிலத்தில் தேர்ச்சி பெறவும், அவ் அழகான மொழியை சிறப்பாகப் பேசவும் அடிப்படை வழி முறைகள் மிகவும் முக்கியம்.

ஆங்கிலத்தை கேட்பதற்கும், பேசுவதற்குமான பயிற்சி முறைகள் (சொந்த அனுபவத்திலிருந்து) :

* நல்ல தரமான ஆங்கில அகராதியை சொந்தமாக எப்போதும் கூடவே வைத்திருங்கள். அதன் மூலம் தினம் குறைந்தது பத்துப் புதிய சொற்களாவது அறிந்து கொள்ளுங்கள். இதற்காக English to Tamil அகராதியை விட English to Tamil அகராதியே பயன் அதிகம் தரக்கூடியது.

* விளையாட்டு வர்ணனையை செவிமடுத்துக் கேட்கலாம். (உங்களுக்கு எதிராக நிறைய விமர்சனம் வரும். Never Never Give Up)

உதாரணமாக கிரிக்கட் வர்ணனை. இதன் மூலம் பல புதிய அழகிய வார்த்தைகளைக் கேட்கலாம்.அர்த்தம் புரியாவிட்டால், அகராதியின் உதவியுடன் அவ் வார்த்தைகளின் அர்த்தங்களைத் தெரிந்து கொள்ளலாம்.

அத்துடன் ஆங்கிலத்தை எப்படி உச்சரிக்க வேண்டும் (English pronunciation), எப்படி உச்சரிக்கக் கூடாது என்பதனையும் கற்றுக் கொள்ளலாம். எப்படி உச்சரிக்கக் கூடாது என்பதற்கு சரியான உதாரணம் - சனத் ஜெயசூரியா.

* சிறுவர்களுக்கான ஆங்கில நிகழ்ச்சிகள், கார்டூன்களை ஆழ்ந்து கேட்டல். (கிண்டல் செய்வார்கள். Never Mind It )

* Discovery போன்ற Channelகள், News Channelகள் மற்றும் ஆங்கிலப் படங்களை Sub Title உடன் பார்த்தல்.

* ஆங்கில செய்தித்தாள்கள், ஆங்கில சஞ்சிகைகள், ஆங்கிலக் கதைப் புத்தகங்கள் என்பவற்றை தெளிவாக உரத்துப் படித்தல்.

* உங்களுக்குள் நீங்களேயோ அல்லது நண்பர்களுடன் சேர்ந்தோ ஆங்கிலத்தில் கதைத்துப் பழகலாம். பிழைகள் வரும்; வந்தால் நல்லது, ஏனென்றால் நீங்கள் ஒன்றும் சும்மா இருக்கவில்லை. முயற்சி செய்கின்றீர்கள்!

* On line இல் கிடைக்கும் இலவச ஆங்கிலப் பயிற்சி நெறிகளையும் முயற்சித்துப் பார்க்கலாம்.

மேலே குறிப்பிட்டவை யாவும் நான் கடைப்பிடித்த வெற்றிக்கான வழி முறைகள்.ஆங்கில இலக்கணப் பயிற்சி முறைகள் பற்றிக் குறிப்பிடாததற்கு முக்கிய காரணம், ஆங்கிலம் என்றாலே நாம் முதலில் இலக்கணத்தைத் தானே படித்துத் தொலைக்கின்றோம்!. இவற்றை விடவும் இன்னும் பலவும் இருக்கலாம். இவற்றை ஒழுங்காகக் கடைப்பிடித்தாலே போதும் என்று நினைக்கின்றேன். இவை எல்லா வற்றையும் விட முக்கியம் முயற்சி! விடா முயற்சி!!

ஆங்கிலத்தில் ஒரு அறிஞர் சொன்னார் : Hard work is a best investment a man can make என்று. அதாவது ஒரு மனிதனின் சிறந்த முதலீடே அவனது கடின உழைப்புத்தான் என்று.

ஆங்கிலம் பேச முடியவில்லையே என்று வருத்தப்பட்டுக் கொண்டிருப்பவரா நீங்கள்? இனியும் அப்படி இருக்கத் தேவையில்லை. முயற்சி செய்யுங்கள்; வெற்றி நிச்சயம்! ஏனென்றால் நான் A/L இல் ஆங்கிலப் பாடத்தில் B தரத்தினைப் பெற்றவன். ஆனால் அது ஒன்றும் சும்மா வந்து விட வில்லை. முதல் முறை F இனைப் பெற்று, பின்னர் கடின முயற்சியாலேயே B பெற்றேன் என்பதை வெளிப்படையாக, நேர்மையாகவும், பெருமையுடனும் கூறிக்கொள்கிறேன். முயற்சி செய்யுங்கள்!!

:-D

கடவுள் ஏன் இல்லை? - ஒரு அறிவியல் நோக்கு!

2011-10-23T21:26:00.000+05:30

மனிதனின் மிக மோசமான கண்டு பிடிப்பு எது என்று யாராவது கேட்டால், பதில் என்னவாக இருக்கும்?

துப்பாக்கியா?,

ஏவுகணையா? அல்லது

அணு குண்டா?

என்னைக் கேட்டால் இவை எதுவுமல்ல என்பேன்.

பதில் கடவுள்!

காரணம் இருக்கின்றது!!

இந்தப் பிரபஞ்சத்தின் தோற்றத்துடனோ அல்லது (நமது ?) சூரியன் போன்ற இதர நட்சத்திரங்களுடனோ அல்லது நமது சூரியக் குடும்பத்திலுள்ள ஏனைய கோள்கள் மற்றும் நம் பூமி, இப் பூமியிலுள்ள ஏனைய உயிரினங்களுடனேயோ ஒப்பிடும் போது மனிதன் அதாவது நாகரீகத்தின் பெயரில் மனிதனாக ஏற்றுக் கொள்ளக் கூடிய சமூக விலங்கின் தோற்றமானது புறக்கணிக்கத்தக்க அளவுள்ள வெறும் 200,000 ஆண்டுகள் தாம். நம் பூமியின் வயது 4.5 பில்லியன் ஆண்டுகள்!!,(நன்றி http://en.wikipedia.org/wiki/Timeline_of_evolution ). பிரபஞ்சத்தின் வயதோ 17.3 பில்லியன் ஆண்டுகள். அத்தனை பில்லியன் ஆண்டுகள் இல்லாத கடவுளை வெறும் 200,000 ஆண்டுகளில் வந்த நாம் தான் படைத்தோம்!

கடவுளின் தோற்றம்

கடவுள் எனும் தோற்றப்பாடு தோன்றுவதற்கு முக்கிய கரணங்கள் எதுவாக இருந்திருக்கலாம்?

மனிதனின் பயம் மற்றும் அறியாமை!

சற்று சிந்தித்துப்பாருங்கள்...(*#@%?)

முதன் முதலாக கிரகணங்களை (சூரிய மற்றும் சந்திர)
{ சூரிய கிரகணம் :- சூரியனுக்கும் , பூமிக்கும் இடையில் சந்திரன் வந்து சூரியனை மறைத்தல்.}{சந்திர கிரகணம் :- சந்திரனுக்கும், சூரியனுக்கும் இடையில் பூமிவந்து, அதன் நிழல் சந்திரன் மீது விழுதல்} பார்த்த மனிதக் கூட்டத்தின் மன நிலை எப்படி இருந்திருக்கும். கிரகணம் என்றால் என்ன வென்றே தெரியாத நிலையில் எவ்வளவு பயந்திருப்பார்கள். சற்று முன்னர் வரை இருந்த சூரியன் சில நொடிகளில் இல்லாமல் போனால் பயம் கொள்வது இயல்புதான். இது போன்ற இன்னும் பல வானியல் நிகழ்வுகள் (உதாரணமாக வால்வெள்ளி தோன்றுவது, எரி கல் பூமியின் மீது விழுவது, சூப்பர் மூன்) மற்றும் இயற்கை அனர்த்தங்கள் என்பவற்றை முதன்முதலாக அனுபவ ரீதியாக அறிந்த சாதாரண மனித கூட்டத்தின் மனநிலை மற்றும் எதுவும் செய்ய முடியாத நிலையை விபரிப்பதற்கு மிகச் சிறந்த உதாரணமாக 2004 இல் ஏற்பட்ட சுனாமியைச் சொல்லலாம்.

அறிவியல் ரீதியில் முன்னேறிய மனிதனாலேயே அச் சுனாமி ஏற்படுத்திய இயலாமையை ஏற்றுக்கொள்ள முடியாத போது, நாக ரீகத் தின் ஆரம்பத்தில் இருந்த மனிதன் என்ன செய்திருப்பான்?

அவர்களுக்கென்றான தலைவனிடம் முறையிட்டிருப்பார்கள். தலைவன் என்ன செய்வான், பாவம் அவன் என்ன விஞ்ஞானியா இவற்றை எல்லாம் அறிவியல் ரீதியாக விளக்குவதற்கு??

இங்கே தான் கடவுள் என்னும் தோற்றப்பாடின் ஆரம்ப விதை விழுந்திருக்க வேண்டும். பண்டைய மனிதன் இயற்கையை வழிபட ஆரம்பித்ததும் இப்படித்தான்.

அதாவது, தம்மை பாதிக்கும் இயற்கையை வழிபடுவதன் மூலம் அதன் பாதிப்பில் இருந்து தப்பிக்கலாம் என்றும், தலைவனான தானே அவ் இயற்கைக் கடவுள்களுடன் நேரடியாக தொடர்பு கொள்ளக் கூடியவன் என்றும், அவனுக்கு வேண்டிய பொருட்கள் மற்றும் இளம் பெண்களை அவனுக்கு காணிக்கையாக கொடுத்தால் அக் கடவுள்களிடம் சொல்லி தம் மக்களுக்கு பாதிப்பு ஏற்படுப்பதைத் தடுப்பேன் என்னும் சுயநலம் சார்ந்த, புத்திசாலித் தனமான எண்ணக்கரு யாரோ ஒரு தலைவனால் தன்னிடம் கட்டுப்பட்ட மனித கூட்டத்திடையே உண்டாக்கப் பட்டிருக்க வேண்டும். (தம்முள் சக்தி வாய்ந்தவனை தலைவன் ஆக்குதல், அத் தலைவன் சொல்வதைக் கேட்டல் மற்றும் ஒற்றர்களை நியமித்தல், அத் தலைவனுக்கு இளம் பெண்களை கொடுத்தல் போன்ற செயற்பாடுகள் நம் மூதாதையரான குரங்கிலிருந்து நம்மிடம் வந்தவை என்பதை சொல்லி வைக்கின்றேன்)

{உதாரணம் :-

பொதுமகன் : தலைவா! கடவுளிடம் சொல்லி நாளைக்கு வேட்டையில், எனக்கு அதிக மாமிசம் கிடைக்கச் செய். கைவசம் உணவு இல்லை.

தலைவன் : அப்படியா! உன் மகள் லுலுவை இன்று இரவு என்னிடம் அனுப்பிவை. அவள் மூலமாக கடவுளிடம் தொடர்பு கொண்டு நீ கேட்பதை செய்யச் சொல்கின்றேன்.

பொதுமகன் : அப்படியே செய்கின்றேன் தலைவா. தலைவன் வாழ்க!! }

அதுவே முதலில் அருகாமை மனிதக் கூட்டத் தலைவனிடம் ஒற்றன் மூலமாகவோ அல்லது பிடிபட்ட அடிமை மூலமாகவோ தெரியவந்து, இப்படியே ஏனைய தலைவர்களிடமும் பரவி, அவர்களும் தம் கற்பனைக்கு ஏற்றாற் போல் கடவுள்களை விதம் விதமான உருவங்களில் உருவாக்கி,

தம் மக்களிடம் அதனை கொண்டு சென்று, எல்லா வற்றுக்கும் காரணம் இக்கடவுள்களே என்று அவர்களையும் நம்பவைத்து, அவர்களும் அதனை நம்பி, வழிபட ஆரம்பித்து, அக் கடவுளுக்கு காணிக்கைகள் மற்றும் உயிர் பலி கொடுக்க ஆரம்பித்து...........எல்லாம் வல்ல கடவுள்களும் மற்றும் அம்மக்களின் நம்பிக்கையைப் பொறுத்து மதங்களும் இப்படித்தான் தோற்றம் பெற்றிருக்க வேண்டும்!

அறிவியலாளர்களின் வரவு

கடவுள்களின் பெயராலும், மூட நம்பிக்கைகளாலும், அறியாமையாலும் மதங்கள் இவ்வுலகை இப்படித்தான் ஆளத் தொடங்கின. மதங்களின் ஆட்சி உச்சம் பெற்றிருந்த காலங்களில் இப்பூமி தட்டையானது எனவும்,

தம் மதங்களிற்கு ஏற்றாற்போல் அட்லஸ், நாகப் பாம்பு, ஆமை,யானைகள், பன்றி போன்றனவே இப் பூமியைத் தாங்கி நிற் பதாகவும், சூரியனே இப்பூமியைச் சுற்றுவதாகவும்,

இன்னும் பல விதமாகவும் காலங் காலமாக நம்பி வந்தார்கள் அல்லது மதத் தலைவர்களால் நம்ப வைக்கப் பட்டார்கள். மாற்றுக் கருத்தை வெளியிட்டவர்கள் கொல்லப் பட்டார்கள். (எப்படிக் கொல்லப் பட்டார்கள் என்பதைக் கூற தனிப்புத்தகமே எழுதலாம். அவ்வளவு கொடூரமானது)

பின்னர் வந்த கிரேக்கத் தத்துவஞானி அரிஸ்டாட்டிலினால்

பூமி தட்டை அல்ல உருண்டை என்று ஆதார பூர்வமாக நிரூபிக்கப்பட்ட பின்னரே அதை வேறு வழியின்றி ஏற்றுக் கொண்டார்கள். அதாவது பூமி தட்டையாக இருந்தால், கடலில் வரும் கப்பல் தெரியும் போது கப்பலின் முன்பகுதி மற்றும் பாய் மரம் என்பன முழுமையாகத் தெரியும். ஆனால் பூமி உருண்டை என்பதால், கப்பலின் முகம் தெரிந்த பின் தான் அதன் பாய் மரம் தெரியும். அதே போல சந்திர கிரகணத்தின் போது பூமி கோள வடிவம் என்பதால் தான் சந்திரனின் மீது விழும் பூமியின் நிழலானது வட்டமாகத் தெரிகின்றது. பூமி தட்டையாக இருந்திருந்தால், சந்திரனின் மீது நிழலானது ஒரு கோடாக மட்டுமே விழுந்திருக்கும்.

அதற்குள் இந்தக் கண்டுபிடிப்பை மக்கள் நம்பும் படி செய்வதற்குள் அவர் சந்தித்த அவ மரியாதைகள், ஏளனங்கள், தண்டனைகள் ஏராளம் ஏராளம் . இப்படியே பின்னர் வந்த அறிஞர்களான தொலமி, கொப்பர்ணிகஸ், கெப்ளர், கலிலியோ கலிலி போன்றவர்களின் (இவர்கள் மட்டுமல்ல இன்னும் பல நூறு விஞ்ஞானிகளும் இதற்குள் அடக்கம். முக்கியமானவராக அல்பேர்ட் ஐன்ஸ் ரீனைக் குறிப்பிட்டாக வேண்டும்) அர்பணிப்புடன் கூடிய கண்டு பிடிப்புக்களால் காலங்காலமாக இருந்து வந்த மூட நம்பிக்கைள் பல படிப்படியாக தகர்த் தெறியப்பட்டன என்பது வரலாறு.

கடவுளின் இன்றைய நிலை

கடவுள் மறுப்பாளர்களிடம் கேட்டுப் பாருங்கள், மறுப்பதற்கு பெரியார் தொடங்கி பெருவெடிப்பு (big bang) வரையிலான ஆயிரம் காரணங்கள் கூறுவார்கள். இந்தப்பிரபஞ்சத்தில் உள்ள அனைத்துக்கும் விஞ்ஞான ரீதியாக விளக்கம் கொடுத்தாயிற்று. இயற்கையின் ஒவ்வொரு நிகழ்விற்கும் விஞ்ஞான ரீதியாக தகுந்த விளக்கம் கொடுக்கும் போதும் கடவுள் பற்றிய நம்பிக்கை கேள்விக்குள்ளாக்கப் படுகின்றது. கடவுள் நம்பிக்கையாளர்கள், கடவுளைக் காலங்காலமாக தொழுபவர்களிடம் கேட்டுப் பாருங்கள், அவர்களிடம் சரியான ஏற்றுக் கொள்ளக் கூடிய காரணமே இருக்காது. கடவுள் நம்பிக்கைக்குக் காரணமாக பின்வருவ வற்றில் ஏதாவது ஒன்றாக இருக்கும்.

1. அறியாமை : என்ன தான் அறிவியல் இவ்வளவு முன்னேற்றம் கண்டிருந்தாலும் அதைப் பற்றி சிறிதும் அறியாமல், முன்பு வாழ்ந்த, கற்பனையில் சிறந்த படைப்பாளிகளின், அளவுக்கதிகமான, அதீதமான கடவுள்கள் பற்றிய படைப்புக்களை முழுதாக நம்பி, கடவுள் புராணங்களையே பாடிக் கொண்டிருப்பது.
கடவுள் மற்றும் சொர்க்கம் நரகம் ஆகியவற்றின் தோற்றப் பாட்டிற்கு முக்கிய காரணமாக இதனைக் குறிப் பிடலாம். அதாவது, படைப்பாளிகள் என்ன செய்தனர் என்றால், தாம் வாழும் சமூகத்தில் நல்லொழுக்கம் மேம்பட வேண்டும் என்பதற்காக, தமது படைப்புக்களில், குற்றம் புரிபவர்கள் இறந்த பின் கடவுளால் நரகத்திற்கு அனுப்பப்பட்டு காலத்திற்கும் துன்பம் அனுபவிப்பர் என்றும், நல்லது செய்வோர் இறந்த பின் சொர்க்கத்திற்கு அனுப்பப்பட்டு என்றென்றைக்கும் கடவுளுக்கு அருகில் இன்பம் திளைக்க வாழலாம் என்றும் நம்பும்படியான ஒரு மாயத் தோற்றம் உருவாக்கப்பட்டது. அது அக் குறித்த சமூகத்தில் பெரும் தாக்கத்தை உருவாக்கி, காலம் காலமாக அத் தோற்றப் பாடு நம்பப்பட்டு வந்தது; வருகின்றது.
( அறியாமைக்கு உதாரணமாக : அமேசான் காடுகளில் இன்றும் உள்ள பழங்குடியினரிடம் நீங்கள் உலகம் என்பது இந்தக் காடு மட்டுமல்ல என்று அரிஸ்டாட்டில் காலத்திலிருந்து ஆரம்பிக்க வேண்டும். ஆனால் என்ன அதற்குள் அவர்கள் உங்களைப் பச்சையாக சாப்பிடாமல் இருந்தால் சரி)

2. இயலாமை : தம் சக்திக்கு அப்பாற்பட்டு வரும் துன்பங்கள் எல்லா வற்றுக்கும் தீர்வு தரக் கூடிய ஒன்றாக கடவுளையே காலங்காலமாக எம் மூதாதையர் நம்பி வந்தது, அந்த நம்பிக்கையையே வேறு வழியின்றி இன்றும் தொடர்வது.

3. கடவுள் பெயரால் பிழைப்பு நடத்துபவர்களுக்கு {சாமியார்கள்(சாமியார் என்றாலே போலி தானே? அதில் என்ன போலிச் சாமியார் என்று தனியாக??), மதத் தலைவர்கள் உட்பட}, எதிர்த்துக் கேள்வி கேட்காத, சொன்னதைச் செய்யும் முட்டாள் மக்கள் தேவை. எனவே அவர்களை மூளைச் சலவை செய்து எப்போதும் தம் சொல் கேட்கும் படி வைத்திருக்க வேண்டியுள்ளது. அதற்கு இந்த கடவுள் சித்தாந்தம் மிகச் சிறந்த வழி.

4. மனிதன் ஒரு சமூக விலங்கு. அவனுக்கு சமூக அமைப்பு இன்றியமையாதது. கடவுள் எதிர்ப்புக் கொள்கையை ஆதரித்தால் எங்கே தான் குறித்த சமூகத்திலிருந்து விலத்தி வைக்கப்பட்டு விடுவோமோ என்கிற பயம் காரணமாக இருக்கலாம். அதனாலேயே கடவுளை ஆதரிப்பது போல் நடித்தல். ( கடவுள் ஒன்றும் வீட்டுக் கதவைத் தட்டி, ஏய் போலி! என்று களுத்தை நெரிக்க மாட்டார் என்று நிச்சயமாகத் தெரியும்)

5. காலம் காலமாக, பரம்பரை பரம்பரையாக, கடவுளைத் தொழுதலை செய்து வருவதாலோ என்னவோ (ஜீன்கள் மூலம் கடத்தப்படும் பழக்கம்?) ஏன் செய்கிறோம் என்று தெரியாமலே பழகிப் போன ஒரு பழக்கத்திற்காக செய்வது.

இவற்றைப்போல் இன்னும் பல காரணங்களும் இருக்கின்றன. கேட்டால் சொல்வார்கள் , இந்த பிரபஞ்சத்தையும், அதில் இந்தப் பூமியையும் , அதில் இத்தனை கோடி உயிரினங்களையும் கடவுள் தான் படைதார். அவர்தான் எங்கும் வியாபித்து இருக்கின்றார். தூணிலும் இருப்பார் துரும்பிலும் இருப்பார். அவரைப் பழிப்பவர்களை அழித்து விடுவார் என்று.......

பாவம்! இவர்கள் அறியாமையை என்ன வென்பது!!

பெரு வெடிப்பு (Big Bang) கொள்கை

எல்லா மதங்களாலும் தங்கள் தங்கள் கடவுளரே இப்பிரபஞ்சத்தைப் படைத்ததாக காலங்காலமாக நம்பப்பட்டு வந்தது.ஆனால் பெருவெடிப்பின் மூலமே இந்தப் பிரபஞ்சம் தோன்றியது கடவுள் மூலம் அல்ல என்று அறிவியலாளார்கள் மூலம் உதாரணத்துடன் நிரூபிக்கப்பட்டது.

13.7 பில்லியன் ஆண்டுகளுக்கு முன், ஆரம்பத்தில் அணுவிலும் சிறிய ஒரு புள்ளியாக, வெப்பத்திலும், அடர்த்தியிலும் மிக மிக, அதிகமாக, கற்பனைக்கு அப்பாற்பட்ட அளவில் இருந்து, ஏற்பட்ட பெரு வெடிப்பின் மூலமாகவே இப்பிரபஞ்சமும் அதைச் சார்ந்த பொருட்களும் (Matter) காலமும்(Time) தோன்றியது. அத்துடன் வேகமாக விரிவடையவும் செய்தது.மிக வேகமாக விரிவடைந்ததன் காரணமாக இப்பிரபஞ்சம் குளிரத் தொடங்கியது. ( அண்மைக் காலம் வரை இவ்விரிவடைதலின் வேகமானது குறைந்து கொண்டு வருவதாகவே கருதப் பட்டு வந்தது. ஆனால் அப்படியில்லை, இப்பிரபஞ்சம் முன்பை விட இன்னும் அதிகமாக விரிவடைந்து கொண்டு செல்கின்றது என அறிவியலாளர்கள் மூவர் கண்டறிந்து சொன்னதற்காக, 2011ல் இயற்பியலுக்கான நோபால் பரிசைப் பெறுவதாக அவர்கள் அறிவிக்கப்பட்டார்கள். கீழுள்ள படம் பார்க்க - )

இந்த நூற்றாண்டின் மிகச்சிறந்த அறிவியலாளராகப் போற்றப்படும் prof. Stephen Hawking சொல்வது யாதெனில், கடவுள் ஒன்றும் ஒரே நாளிலேயே இப்பிரபஞ்சத்தைப் படைக்கவில்லை. விஞ்ஞான ரீதியாகக் கூறுவதானால்,
புதிதாக பிரபஞ்சம் உருவாக என்ன வெல்லாம் தேவை? 1.சக்தி(Energy), 2.பொருள்(Matter) மற்றும் 3.வெளி (Space) ஆம், இந்த மூன்றும் தான் தேவையானவை.அப்படியானால் இந்த மூன்றும் எங்கிருந்து பெற்றுக் கொள்ளப் பட்டன?.
விடை - இம்மூன்றும் பெருவெடிப்பின் மூலம் (Big Bang)பெற்றுக்கொள்ளப்பட்டன. ஆம். BIG BANG!!. பெருவெடிப்பின் பின்னர் தான் இடமும் காலமும் தோன்றியது. (Space and Time) பெருவெடிப்பின் முன் காலம் என்பதே இருக்கவில்லை. எனவே இல்லாத ஒருகாலத்தில் கடவுள் எப்படி இருக்க முடியும். கடவுள் என்பவருக்கு அங்கே இடமில்லை.
நாம் வாழும் பூமியின் விளிம்பைத் தொடப்போவதாக யாராவது கிளம்பினால் அவர்களை என்னவென்பது.வெறும் பைத்தியக்காரர்கள். ஏனென்றால் நாம் வாழும் பூமி கோள வடிவமானது. கோளத்திற்கு விளிம்பில்லை என்பதுதானே வெளிப்படை உண்மை??. பெரு வெடிப்பு ஏற்பட்டதிலிருந்து இன்றைய திகதியில் உலகம் உள்ளது வரைக்கும் எந்தக் கணத்திலும் கடவுளுக்கான தேவை இருக்கவில்லை. எனவே கடவுள் இல்லை! God Doesn't Exist!!

மேலே சொன்னது போல் பூமியின் விளிம்பைத் தொடப்போகிறேன் என்பவர்களுக்கும், கடவுள் இருக்கின்றார் என்பவர்களுக்கும் பெரிதாக வித்தியாசமில்லை என்றே படுகின்றது!

வெறும் பைத்தியக்காரர்கள்!!

(முற்றும்)

மைக்ரோ கவிதைகள் - 04

2011-07-18T15:03:00.001+05:30

வெறுமை நிரம்பிய
தேநீர்க் கோப்பைக்குள்
விண்மீன்களை
வெறித்துப் பார்த்துக்கொண்டு

இருக்கிறேன் .....

*****

நிகழ்ச்சி நிரலின்
நேர அட்டவணையில்,
கண்ட இடத்தில்
கண்களால் சுடப்படும்
எனப் போட்டிருக்கிறாய் ....
காலையிலா? மாலையிலா?
சற்று
கணித்துச்சொல்!

*****

பிக்காஸோவின் ஓவியமும்
நீயும் ஒன்றுதான்.இரண்டுமே

கண்களுக்கு அழகானவை.

ஆனால்

புரிந்துகொள்ளல் கடினம்.

இரண்டையும்

அருகிலேயே

வைத்திருக்க நினைத்தல்

அதிகப் பிரசங்கித்தனம்.

*****

உனக்குப் பிடித்தவர்களிடம்
உண்மையைச் சொன்னாலும்
நம்பமாட்டார்கள்.
உன்னைப் பிடித்தவர்களிடம்
எதைச் சொன்னாலும்
உடனே நம்புவார்கள் என்பது

நடைமுறை வழக்கம்.

*****

சுதந்திரம் என்றால் என்ன?
அது -
கை விலங்கை
உடைப்பது அல்ல!
இறுகப் பூட்டியிருக்கும்
கை விலங்கை
மணிக்கட்டின் அசைவுக்காக
கொஞ்சம்
தளர்த்திப் பூட்டுவது.
அவ்வளவே!

*****

தசையைப் புணர்ந்து,
தசையைப் புசித்து,
தசையை வளர்ப்பது
வாழ்க்கையல்ல.
போலிச் சாமியார்களிடம்
மாட்டிக் கொண்ட பெண்கள்
புலம்புவது
இப்படித்தான்.

.
.
.

காதல் எனும் கடினப்பந்து

2011-07-10T23:04:00.001+05:30

எனக்கருகில்
ஏகப்பட்ட மனிதர்கள்.
இருந்தும்,
இதயத்திற்கருகில்
உன்னுடன் சேர்த்து
ஒருசிலரே .....

உன்னை விட
யாராலும்
இவ்வளவு கச்சிதமாக
சுழற்றிப்போட முடியாது
காதல் எனும்
கடினப்பந்தை.

வெறி கொண்டமட்டும்
கடித்துக் குதறுமாம்
வேங்கை.
பதுங்கியிருந்து
கழுத்தில் பாய்ந்து
நரம்புகள் வெடிக்க
பற்களைப் பாய்ச்சி
இரசித்துச் செய்யும்
தன் உணவின்
கொலையை.
சிரித்துக் கொண்டே
சொல்கிறேன்.....
காதலும்
அதைத்தானே செய்கிறது.

எங்கே என்று
பார்த்து விட்டு,
உன் வார்த்தைகளுக்கு
இடையில் ஒட்டிக்கொண்ட
மௌனத்தில்
தன் சாமர்த்தியத்தை
காட்டிவிட்டு,
ஓய்வு நாற்காலியில் போய்
உட்கார்ந்து
கொல்கிறது காதல்!

.
.
.

மைக்ரோ கவிதைகள் - 03

2011-07-08T10:06:00.000+05:30

காதலில் தோற்றவர்கள்
சாலைகளில்
தலைகுனிந்து செல்வதற்கும்,
உலகத்தின்
கடைசி மனிதனாக
தனித்து நிற்பதற்கும்,
நூற்றாண்டு சோகத்தை
புன்னகைத்து மறைப்பதற்கும்
காரணம் காதல் என்பார்கள்..........
உண்மை என்னவென்றால்,
"கசக்கும் வரம் வேண்டுமா?
இனிக்கும் சாபம் வேண்டுமா?"...
என்று எப்போதுமே கேட்கும் காதல்.
விருப்பப்பட்டு
சாபத்தை தேர்தல் .....
காதலின் குற்றமல்ல!

*****

நமக்காகக் கட்டிய கோட்டை
இடிந்து விழுந்த போது
அதிலிருந்து
எந்தப் பீனிக்ஸ் பறவையும்
மீண்டும் பறக்கவில்லை!
மணற்கோட்டைகளில்
சிறகுகள் முளைக்காது
என்பது
அது இடிந்து விழும்வரை
யாருக்கும் புரிவதில்லை!!

*****

பல பெண்கள் பார்க்கச் செய்கிறார்கள் ....
சில பெண்கள் ரசிக்கச் சொல்கிறார்கள் ....
நீ மட்டும் ஏன் என்னை
அழகாகத் தவிர்க்கிறாய்?

என்று கவித்துவமாக

ஆரம்பிக்கும்

ஒருதலைக் காதலர்கள்,

தங்களை பகுதிநேரக் கவிஞர்கள்

என்றே சொல்லிக்கொள்கிறார்கள்.

அவர்களின் காதல்

எய்தப்படுவதில்லை என்பதையும்

நேர்மையுடன்

ஏற்றுக்கொள்கிறார்கள்.

*****

மின்மானி வாசிப்பாளர் வேலையில்
தினமும்
சந்தோஷமும் அன்பும்
செழித்துக் கொளிக்கும்
ஏழை வீடுகளையும் பார்க்க முடிகின்றது.
சந்தோஷத்திலும் அன்பிலும்
ஏழ்மையான
பணக்கார வீடுகளையும் பார்க்க முடிகின்றது....
முன்னையவருக்கு மட்டுமே
வாழ்க்கைக்கான
சூத்திரம் தெரியும் போல...

*****

அவமானப் படுத்தியவரிடமும்
ஏன் அன்பாகப் பேசவேண்டும்

என்பது

நண்பனின் முறைப்பாடு.
எதிரியையும் வீழ்த்தவேண்டும் ...
அம்பால் அல்ல
அன்பால்!
அதுவே நல்ல கோட்பாடு.

*****

எல்லோருக்கும் உள்ளேயும்
ஒரு சாத்தான் ஒளிந்திருக்கிறது.
அதை அடக்கி ஆள்பவனை
நல்லவன் என்கிறோம்,
அவ்வப்போது வெளியே விடுபவனை
சந்தர்ப்பவாதி என்கிறோம்,
சாத்தானாக மாறியவனை
கெட்டவன் என்கிறோம் .....
நிச்சயமாக
நம் எல்லோருக்குள்ளேயும்
ஒரு சாத்தான்
ஒளிந்திருக்கவே செய்கிறது !

.
.
.

மைக்ரோ கவிதைகள் - 02

2011-06-18T14:40:00.001+05:30

நாமெல்லோரும்
பாதுகாப்பதாக நினைத்து
உள்ளங்கைக்குள்
ஒரு அழகான பட்டாம் பூச்சியை
எப்போதுமே
அடைத்து வைத்திருக்கின்றோம்.
அந்தப்பட்டாம்பூச்சி -
நம் வாழ்க்கை!

அதை அழுத்திக் கொல்வதும்
அன்றி
சுதந்திரமாக பறக்க விடுவதும்
அவரவர் இஷ்டம்!

இறக்கை ஒடிந்த
பலரின் பட்டாம்பூச்சிகள்
பறக்க முயற்சிப்பதை
பார்த்திருக்கின்றேன்.
ஆனால்.....
அவை பறப்பதேயில்லை!!

*****

நீண்ட வரண்ட
கோடைக்குப் பிறகு

வாழ்க்கையை

நேசிக்க ஆரம்பிக்கையில் ..........
அவ்வளவு அழகானதாகவும்,

அர்த்தமுள்ளதாகவும்

படுகின்றது வாழ்க்கை!
காதலால் தொலைத்ததை
நட்பினால் பெறல்.....

குற்றமல்ல!

மைக்ரோ கவிதைகள்

2011-06-16T14:02:00.001+05:30

வானத்தெருவில்
கொட்டியிருக்கும்
நட்சத்திர அரிசியை
கொத்தித் தின்னும்
இரவுக் குருவியை எங்கே

இன்னும் காணோமே ?????

*****

மேகத்தின் பொக்கற்றுக்குள்
இருந்து
நழுவிக்கொண்டிருக்கின்றது
நிலவு.
எப்போது விழுமோ....
ஏந்தக் காத்துக்கொண்டிருக்கின்றேன்.

*****

மாம்பழம்,
பலாப்பழம்,
பப்பாப்பழம் கூட
உணவு மேசையில் உள்ளது.
ஆனாலும்
புளிக்கும் திராட்சையே
ஏனோ பிடித்திருக்கின்றது.

*****

தாயின் அன்பும்
தந்தையின் அரவணைப்பும்
உயிரினத்தின்
அடிப்படைத் தேவைகள்.
அதுகூட கிடைக்காதவர்களுக்கு
என்னுடைய சிபாரிசு ...
காதல்!
காதலியுங்கள்.
நல்ல பெண்களைக் காதலியுங்கள்!

*****

தேநீர் வேளை

2011-06-06T14:17:00.003+05:30

உனக்கும் எனக்குமிடையிலான

தேநீர் வேளைகளை

நான் அதிகம் நேசிக்கின்றேன்...

காதற்ற தேநீர்க் குவளையை

நீ நீட்டும் போது

உன் கைவிரல்கள் தொடாமல்தான்

வாங்கப் பார்க்கின்றேன்.

மீறியும் பட்டால்

முறைக்காதே.

என் தவறு ஏதுமில்லை.
இரும்பைக் கவர்வது

காந்தத்தின் இயல்புதானே....

நீ தரும் தேநீர்

உள் நாக்கில் தித்திக்கும்.

உன் கூந்தல் வாசம்

என் உயிரோடு கலக்கும்.

நம் இயல்பான

பேச்சுக்களின் இடையே

உன் கண்கள்
என் கண்களை

வேறு உலகத்திற்கு

இட்டுச்செல்வதை தடுக்க முடியாமல்

தடுமாறி, நொருங்கி

உன் தேநீர்க் குவளைக்குள்

விழும் என்னை

சட்டென எடுத்துக் குடிப்பாய்.

நீ விரும்பித்தான் குடித்தாயா என்பதை

உன் கடைவாயில் ஒட்டியிருக்கும்

காதல்தான் சொல்ல வேண்டும்!

3 கவிதக

2011-06-01T16:28:00.000+05:30

தொந்தி கரைய

காலையில் ஓடுபவர்களை

பார்க்கும் போதெல்லாம்

தோன்றுகின்றது.....

ஏழைகளுக்குப் பட்டினி

இவர்களால் தானா?

***

காமம் தழுவி,

அவளை அவிழ்க்கத் துடிக்கும்

என் கண்களைப் பார்த்தாள்

காதலி!

உணர்ந்தேன்.

உடலைத் தின்பது காமம்

உயிரைத் தின்பதே காதல்

என்பதை உணர்ந்தேன்!

உடனேயே மன்னித்தாள் காதலி.

மன்னிக்கவேயில்லை காதல்!

***

பணம் தான்...

காலுக்குக் கீழேயிருந்தால்

நலம்.

இதயத்திற்கு அருகில் வந்தால்

ஆபத்து!

தலைக்கு மேலே போனால்......

ஆழ்ந்த அனுதாபங்கள்!!

***

நகர வாழ்க்கை

2011-03-08T14:08:00.002+05:30

நகரவாழ்க்கையின் பாதியை

நிரம்பிவழியும் பேரூந்துகளும்,

அதுசுமக்கும்

வியர்வைநாற்றங்களும்,

எதிர்ப்புஊர்வலங்களும்,

சாலைநெரிசல்களுமாய்

சர்வாதிகாரமாக

விளுங்கிக்கொண்டிருக்கின்றன...

கடற்கரைகாற்றுக்கும்

வர்த்தகச்சாயம்
பூசப்பட்டுக்கொண்டிருக்கின்றது.

சுத்தமானதாகச்சுவாசிக்க

கியூவில் நின்று

டிக்கட் எடுக்க வேண்டி வரலாம்...

விளம்பரப்பலகைகளில் தான்

எத்தனைஇளம் பெண்கள்...

உதடுகளில்
உயிர்இல்லாமல்,

உள்ளாடையும்அணியாமல்!

விரைவு உணவுகள்

நாக்கைஏமாற்றி,

விரைவாகவே

சிறுகுடலில் விஷமாகின்றன.

இருந்தும்

விரும்பி உண்ணப்படுகின்றன!

போட்டிபோட்டுக் கொண்டு

வளரும்கட்டடங்கள்

பொருளாதாரத்தைக்கூட்டுகின்றனவாம்...

கட்டடங்களில்நிற்கும்

தொடர்பாடல்கோபுரங்களின்

அலைக்கற்றைகள்

மனிதஆயுளைக் குறைக்கின்றதே!

குறுஞ்செய்திகளில்

உறுதிசெய்யப்படும் காதல்,

ஹோட்டல்அறையில்

கற்பை-

சோதித்துப்பார்க்கச்
சம்மதிக்கின்றது.....

மென்மையை விற்கும்

உதட்டுச்சாயம் பூசிய

விபச்சாரப்பெண்களை

பிரத்தியேகசாலைகளில்

உணரலாம்!

சமூகவலைத்தளங்களில்
மூழ்கிக்கிடக்கும்இளந்தலை முறை-
ஆணிடம்பெண்ணாகவும்,
பெண்ணிடம்ஆண்மையானவனாகவும்
ஏமாற்றிக்கொண்டிருக்கின்றது!
இவர்களின்
ஆண்குறியை வெட்டினால் தகும்.

புகைவண்டி ஏறி,
கட்டணக்குளியல் போட்டு,
புளித்ததைஉண்டு,
அலுவலகம்விரையும்
ஆயிரக்கணக்கானோரையும்
நகரம் உள்வாங்குகின்றது,

ஆனால்கண்டுகொள்வதில்லை!

சொகுசுவாகனங்களில் ,
ஆங்கிலம்பேசி,

பணத்தால்அடிக்கும்
மேல் தட்டுவர்கத்தவரையே
நகரம் மென்மையாகத்தாங்குகின்றது!

நகரம்-

மனம்நிறைவாக,
பணத்தின்தேவை அதிகமற்று,
மனிதத்துடன் வாழ்வதற்கான தகுதியை
எப்போதோ இழந்துவிட்டது!
.

இயற்கை வைத்தியம்

2011-01-15T00:40:00.000+05:30

முதல் நனைப்பிலேயே

முற்றத்து ஜீவன்களை

சுவாச அறைகளில்

இனிக்கச் செய்வதிலும்,

குடையின் உச்சியிலிருந்து

வெள்ளை முத்தாக

நிலம் நோக்கி

பொத்தென விழுவதிலும்,

கண்ணாடிகளின் பரப்புகளை

ஆக்கிரமித்து

நீர் ஓவியங்களை

அங்கங்கே தீட்டிச் செல்வதிலும்,

அழையா நண்பனாகவும்,

அன்பான எதிரியாகவும்,

தகரத்திலும்,

கோப்பைகளிலும்,

வீட்டுக் கூரையிலும்

விதம் விதமாய்

ஓசை செய்வதிலுமாய்....

மழை போடும் வேஷங்களை

பேதமின்றி ரசிக்க முடிகின்றது!

மனம் தோற்றுப் போகும்

நேரங்களில்,

தேற்றிக் கொள்வது

எப்படி என்பது பற்றி - இயற்கை

எனக்குச் சொல்லித் தந்திருக்கின்றது!

ஐயோ பாம்பூ!

2010-12-21T21:36:00.004+05:30

மேலே உள்ள படத்தைப் பார்த்தாலே கணினியின் சித்து விளையாட்டுப் புரிந்துவிடும். இப்படித் தான் சமீப காலமாக இலங்கையில், அதுவும் வட மாகாணத்திலே இது போன்ற மாய வேலைகள் நடந்து கொண்டிருக்கின்றன. அண்மையில் பொக்கணைப் பகுதியில் பிடிபட்டதாகச் சொல்லி, photoshop மூலமோ அன்றி வேறு software மூலமாகவோ வடிவமைக்கப்பட்ட ஐந்து தலை நாகத்தைப் பற்றி அதிகம் பேசப்பட்ட்டது. கீளே உள்ள படத்தைப் பார்க்கவும்.

நன்றாக உற்றுப் பார்த்தால் அதில் உள்ள சூட்சுமங்கள் தெரிந்துவிடும். அட அட, என்ன அழகாக போட்டோவிற்குப் போஸ் கொடுக்கிறது பாருங்கள். “ என்னை அழகாகக் கிளிக் செய். நானுனக்கு வைரம் தருகிறேன்” என்று பாம்பு சொல்லியிருக்குமோ?

இப்படம் பொய்யானது என்பதற்கான காரணங்கள் :

* இப்படத்தில் காணப்படும் பாம்பின் நிழல் ஒருதலைப் பாம்பிற்குரியது. (ஒருதலைப் பாம்பின் படத்தை எடிட் செய்திருக்கிறார்கள்)

* இப்படம் (ஒரு தலைப் பாம்பு) தேர்ந்த ஒரு புகைப்படக் கலைஞனால் எடுக்கப்பட்ட படம் என்பது அதன் தரத்திலேயே தெரிகின்றது.(இந்தப் பதிவில் இப்படத்தை இணைக்கும் போது அதன் தரம் சற்றுக் குறைந்து விட்டது ) டிஸ்கவரி நிகழ்ச்சிகளிலெல்லாம் பார்த்திருப்போம். அதேபோல காத்திருந்து, எந்த இடையூறும் இல்லாமல், உயர் ரக கமெராவால் எடுக்கப் பட்டிருக்கிறது என்பதனை, படத்தைப் பார்க்கும் போதே ஊகித்தறியலாம். சாதாரண கமெராவுள்ள தொலைபேசி மூலம் இப்படித் தரமாக படம் எடுக்க முடியாதல்லவா?

* இப்படி உண்மையில் இருந்திருந்தால், நம்மவர்கள் அதனை இப்படிச் சுதந்திரமாக விட்டிருப்பார்களா என்ன? மக்கள் கூட்டத்தைப் பார்த்தும், அவர்கள் போடும் கூச்சலைக் கேட்டும் அந்தப் பாம்பு பயத்தில் ஓடிவிடாமல் நின்று படத்திற்குப் போஸா கொடுக்கும்?

இனி உங்களுக்காக .....

இப்படத்தை உருவாக்கியவர்களை உண்மையில் பாராட்டத் தான் வேண்டும். மெத்தப் படித்தவர்களையும் கடவுள் பெயரால் கண்மூடித்தனமாக நம்ப வைத்தவர்கள் அல்லவா?
கற்பனைத் திறன் என்பது எம்மவர்களுடன் இன்று நேற்றல்ல, காலங் காலமாக, பல ஆயிரம் வருடங்களாக வந்துகொண்டிருக்கும் ஒன்று. பல கர்ண பரம்பரைக் கதைகளிலும், நூல்களிலும், இதிகாசங்களிலும் இல்லாத கற்பனைத் திறன்களா? ஆனால் என்ன அதனை இன்று வரைக்கும் கடவுளோடு சம்பந்தப் படுத்தி மீண்டும்,மீண்டும் குண்டுச் சட்டிக்குள் குதிரை ஓட்டிக் கொண்டிருக்கிறோம் என்பது தான் கவலை தரும் விடயம். நாளைய சந்ததியை இப்படியான மூட நம்பிக்கைகளுக்கு காவுகொடுப்பதோ அல்லது நல்ல அறிவியலை ஊட்டி அறியாமை எனும் களையை பிடுங்கி எறிந்து, ஊட்டமான சந்ததியை உருவாக்குவதோ நம் கைகளிலேயே உள்ளது.

அது வரைக்கும் எமக்கு அறிவியல் முன்னேற்றமென்பது மந்தகதியில் தான் அமையும்!
அதுவரைக்கும் பட்டினி கிடந்து உங்கள் கடவுளுக்கு உணவு படையுங்கள்!
அதுவரைக்கும் உங்கள் கடவுளைக் குளிப்பாட்டுங்கள், ஆடையுடுத்துங்கள், நகை அணிவியுங்கள், நகை களவு போய்விடும் என்று உங்கள் கடவுளைப் பூட்டுப் போட்டு பூட்டியும் வையுங்கள்!!

கிணற்றுத் தமிழா எப்போது வெளியே வரப்போகிறாய்???
.
.
.

மனதில் பட்டவை

2010-12-17T00:19:00.002+05:30

எதுவும் நடக்கவில்லையே என்கிற யோசனையில் அதிகம் நகம் கடிப்பவரா நீங்கள்.?

அப்படியாயின் நல்லது.

நீங்கள் ஒன்றும் வீண் பொழுது போக்கவில்லை. உங்கள் நகத்தைச் சுத்தமாக்குவதில் நேரத்தை முதலிடுகிறீர்கள் என்று அர்த்தம்!

................................................................................................................................................................

நண்பர்கள் மேல் கோவமா? அவர்கள் கண்கள் பார்த்து, மௌனமாகத் திட்டுங்கள். நண்பர்களைப் பாராட்ட வேண்டுமா? நண்பனைத் தவிர மற்ற வர்களிடம் அவனைப் பற்றி சத்தமாகப் பாராட்டுங்கள்!

................................................................................................................................................................

உலகமே நாடக மேடை. நாமெல்லாம் அதில் நடிகர்கள் என்கிறார்கள். எனக்குத் தரப்பட்டது மோசமான கதாபாத்திரமோ என்னவோ!

................................................................................................................................................................

பெண்கள் பூக்களின் இதழ்களைப் பிய்த்துப் போடுபவர்கள். ஆண்கள் அழகானவற்றைக் கற்பழிப்பவர்கள். நான் இயற்கையை என்றென்றைக்கும் ஆராதிப்பவன். எனக்கு நண்பனோ அல்லது நண்பியோ இல்லை.

நம்புங்கள்!

................................................................................................................................................................

எல்லோரும் பணத்தைச் சம்பாதிக்க ஓடுகிறார்கள். அவர்களுக்கு எனது வாழ்த்துக்கள்!. இன்னும் அதிகமாகச் சேருங்கள். உங்கள் சவப்பெட்டியை உயர்ந்ததாக்கவும், பூக்களால் அலங்கரிக்கவும் அது உதவும்!

................................................................................................................................................................

நிறையத் தோற்பதிலும் வசதி இருக்கிறது. தோற்பவர்களால் மட்டுமே தொடர்ந்தும் கற்றுக் கொள்ள முடிகிறது. வெல்ல ஆரம்பிப்பவர்கள் தான் கற்றுக் கொடுக்கவும் ஆரம்பித்து விடுகிறார்களே!

................................................................................................................................................................

பெண்கள் மேல் ஈர்ப்பு இல்லையா? அழகிய, கலை வேலைப்பாடுள்ள மட்பாண்டத்தில் உள்ள வெறுமை மட்டுமே தெரிகின்றதா? எதன் மீதும் பற்று இல்லையா?

நல்லது.

ஞானம் பெற்றுவிட்டதாக ஞானிகளும், யோகிகளும் சொல்லக் கூடும். நம்பாதீர்கள்.

மரணத்திற்குத் தயாராகி விட்டதாக, ஒருவேளை psychologist சொன்னால் உடனேயே நம்புங்கள்.